BAA Ho‘rmuz bo‘g‘ozining ochilishi uchun harbiy harakatlarni qo‘llab - quvvatlaydi
Dunyo neft ta’minotining taxminan 20 foizi har kuni Ho‘rmuz bo‘g‘ozi orqali o‘tadi. Bu esa uni global energetika bozori uchun nihoyatda muhim yo‘lga aylantiradi.
Birlashgan Arab Amirliklari dunyodagi eng muhim neft yo‘laklaridan biri bo‘lgan Ho‘rmuz bo‘g‘ozini kuch ishlatish orqali qayta ochishga qaratilgan AQSh boshchiligidagi tashabbusni qo‘llab - quvvatlashga tayyorlanmoqda.
Wall Street Journalning seshanba kuni arab rasmiylariga tayanib bergan xabariga ko‘ra, BAA Xavfsizlik kengashi, ehtimoliy harbiy amaliyotga ruxsat beruvchi qarori uchun lobbi faoliyatini olib bormoqda. Shuningdek, BAA ushbu strategik suv yo‘lini himoya qilish uchun AQSh, Yevropa va Osiyodagi ittifoqchi davlatlar bilan koalitsiya tuzishga chaqirmoqda.
Xabarga ko‘ra Abu - Dabi ilk bor mojaroga bevosita aralashishni ko‘rib chiqmoqda hamda minalardan tozalash amaliyotlari kabi o‘z zimmasiga olishi mumkin bo‘lgan ehtimoliy harbiy vazifalarni ham baholamoqda.
Wall Street Journal, shuningdek, BAA Tashqi Ishlar vazirligining bayonotini ham e’lon qildi. Unda “Ho‘rmuz bo‘g‘ozida navigatsiya erkinligini ta’minlash zarurligi bo‘yicha keng global kelishuv borligi” ta’kidlanib, bu yo‘nalishdagi uzilishlar borasidagi xalqaro xavotirlar qayd etilgan.
Bu qadam AQSh – Isroil – Eron urushi Ko‘rfaz mintaqasida beqarorlikni kuchaytirayotgan bir paytda tashlanmoqda. Eron 2 - mart kuni bo‘g‘ozda harakatlanish cheklovlarini e’lon qilib, muvofiqlashtirilmagan holda o‘tgan kemalarga zarba berilishi mumkinligi haqida ogohlantirganidan beri keskinlik ortib bormoqda.
Dunyo neft ta’minotining taxminan 20 foizi har kuni ushbu tor bo‘g‘oz orqali o‘tadi. Bu esa uni global energetika bozori uchun nihoyatda muhim yo‘lga aylantiradi.
Kuchayib borayotgan beqarorlik neft narxlari bilan birga yuk tashish va sug‘urta xarajatlarining ham oshishiga olib keldi. Inqiroz chuqurlashsa, yana ham ko‘proq iqtisodiy zarba to‘lqinlari yuzaga kelishi mumkinligi haqidagi xavotirlar ortmoqda.