Rossiya bilan Ukraina dushanba kuni tuni bo‘yi davom etgan va ikki mamlakatdagi energetika infratuzilmasini nishonga olgan havo hujumlarini uyushtirish ishlarini bir - biriga to‘nkamoqda.
Ukraina ommaviy axborot vositalari Rossiyaning Rostov viloyatidagi Novocherkassk elektr energiyasi stansiyasiga qarshi Ukraina tomonidan insonsiz havo vositalari orqali hujum uyushtirganini ma’lum qildi.
Shuningdek, Ukraina Rossiyani, Odessa viloyatidagi infratuzilma obyektlarini nishonga olishda aybladi.
Rossiya Mudofaa vazirligi Rostov viloyatida Ukrainaga tegishli oltita insonsiz havo transporti urib tushirilganini ma’lum qildi ammo elektr stansiyasiga ziyon yetib - yetmagani haqida hech qanday ma’lumot bermadi.
Shu bilan birga Rossiya ommaviy axborot vositalari obyektga ziyon yetkazilganini tasdiqlab, qulagan insonsiz havo vositalari qoldiqlari stansiyaning bir qismida yong‘in kelib chiqishiga yo‘l ochganini bildirdi.
Davom etayotgan janglar yuzasidan tomonlarning o‘zaro iddaolarini mustaqil ravishda tasdiqlash hozircha qiyin.
Britaniya raketalari Ukrainani jangovar holatda ushlab turadi
Bu orada Buyuk Britaniya 2026 - yili Ukrainaga berilayotgan yordamni oshirish va Ukraina mudofaasini kuchaytirish niyatida yangi taktik ballistik raketalar ishlab chiqarilishini e’lon qildi.
Buyuk Britaniya Mudofaa vazirligi yakshanba kuni kechasi mavzu haqida bergan bayonotida, Project Nightfall loyihasi doirasida, Ukraina uchun 200 kg (440 funt) og‘irlikdagi jangovar kallakni 500 kilometrdan (310 mil) ortiq masofaga eltishga qodir yerga joylashtiriladigan ballistik raketalarni tezkor ishlab chiqish bo‘yicha tanlov boshlatilganini ma’lum qildi.
Ushbu tashabbus Buyuk Britaniyaning mudofaa sanoatini mustahkamlash, innovatsiya va o‘sishni qo‘llab - quvvatlash, shuningdek Rossiyaga qarshi urush olib borayotgan Ukrainaga 2026 - yilgacha yordam berish ishlarini kengaytirishni maqsad qilgan.
Dastur doirasida har bir raketaning maksimal narxi 800 ming funt sterling (1 million dollar) etib belgilangan bo‘lib, Ukrainaga xorijiy eksport nazoratlari minimal bo‘lgan, kuchli va tejamkor uzoq masofali zarba berish imkoniyati taqdim etilishi ko‘zda tutilmoqda.
