Meloni: Isroilning noqonuniy aholi punktlarini kengaytirishiga qarshimiz
Italiya G‘azoga gumanitar yordam berishni davom ettiradi, shu bilan birga mintaqada tinchlik va barqarorlikni qo‘llab-quvvatlaydi.
Meloni chorshanba kuni Senatda so‘zlagan nutqida Italiya Yevropa tomonidan Isroilning ko‘chmanchi aholi punktlarini kengaytirish rejalariga va ayrim isroillik rasmiylarning zo‘ravonlikka oid bayonotlariga qarshi sanksiyalarni qo‘llab-quvvatlashga tayyor ekanini yana bir bor ta’kidladi.
“Biz Isroilning ko‘chmanchi aholi punktlarini kengaytirish rejalarini qoraladik va ayrim isroillik rasmiylarning zo‘ravonlikka oid bayonotlarini qabul qilib bo‘lmas deb hisoblaymiz. Shu sababli, biz ularga qarshi individual Yevropa cheklov choralarini qo‘llab-quvvatlashga tayyormiz,” dedi u payshanba kuni bo‘lib o‘tadigan Yevropa Kengashi sammiti oldidan.
Meloni, AQSh Prezidenti Donald Tramp tomonidan taqdim etilgan va Sharm el-Shayxda imzolangan 20 bandlik rejani “juda ijobiy va aniq rivojlanish” deb atadi.
“Bu muhim qadamni amalga oshirishga imkon bergan diplomatik sa’y-harakatlari uchun barcha vositachilarga chuqur minnatdorchilik bildiramiz: men Misr, Qatar va Turkiya hukumatlarini nazarda tutyapman. Eng avvalo esa, bu muvaffaqiyat uchun favqulodda energiya sarflagan AQSh Prezidenti Donald Trampni ta’kidlamoqchiman,” dedi u.
G‘azoga yordam…
Meloni dunyo endi Yaqin Sharqda barqaror tinchlik uchun “ishonchli istiqbol”ga ega bo‘lganini, ammo bu hali ham “zaif” ekanini ta’kidladi.
“Hamasning sulhni buzganini” eslatib, Meloni Italiya Isroilning javob choralariga rozi emasligini, ammo Hamasning o‘tish davri boshqaruvi yoki kelajakdagi Falastin davlati boshqaruvida ishtirok etmasligi kerakligini ta’kidladi. U bu holatni Italiya tomonidan Falastin davlatini tan olish uchun “zarur shart” deb atadi.
Italiya “G‘azo uchun oziq-ovqat” gumanitar operatsiyasi doirasida G‘azoga 2 000 tonnadan ortiq un va 200 tonnadan ortiq boshqa yordam yuborganini eslatib, Meloni gumanitar yordamni davom ettirishga va’da berdi.
Shuningdek, u Falastin Milliy Ma’muriyatiga barcha zarur yordamni, jumladan, rahbariyatni tayyorlashda ko‘mak berishga tayyorligini bildirdi:
“Biz Falastin politsiyasini tayyorlash uchun yillar davomida Erixonda bo‘lgan karabinyerlarimizni, shuningdek, Rafahdagi Yevropa Ittifoqi missiyasini kuchaytirishga tayyormiz. Men buni Prezident Abbosga shaxsan aytaman — u bilan noyabr boshida Rimda uchrashishga kelishib oldik,” dedi u.