Prezident Erdog‘an AQSH va Eron o‘rtasidagi sulhni olqishlab, barqarorlikka chaqirdi

Prezident Rejep Tayyip Erdo’g‘an chorshanba kuni Isroil va AQSHning Eronga qarshi urushida e’lon qilingan o‘t ochishni to‘xtatish kelishuvini mamnuniyat bilan kutib olganini aytdi. U sulhning maydonda to‘liq tatbiq etilishi zarurligini ta’kidlab, har qanday fitna yoki sabotaj harakatlaridan ehtiyot bo‘lishga chaqirdi.

Prezident Erdo’g‘an "X" ijtimoiy tarmog‘idagi sahifasida quyidagicha yozdi:

"28-fevraldan buyon mintaqamizni olov ichida qoldirgan urushda kecha tunda e’lon qilingan o‘t ochishni to‘xtatish kelishuvidan mamnunmiz."

Erdo’g‘an, shuningdek, sulhga erishishda mehnat qilgan barcha tomonlarni tabrikladi va ushbu jarayonda Pokistonning qo‘shgan hal qiluvchi hissasiga alohida to‘xtalib o‘tdi. Prezident o‘z so‘ziga shunday qo‘shimcha qildi: "Urush, to‘qnashuv, taranglik va zulmlardan ko‘p jabr ko‘rgan geografiyamizning imkon qadar tezroq tinchlik, osoyishtalik va barqarorlikka qovushishi bizning samimiy tilagimizdir."

Bundan tashqari, Erdo’g‘an Turkiyaning xalqaro maydonlarda o‘z pozitsiyasini faol ravishda o‘rtaga qo‘yishini va ham mamlakatda, ham dunyoda tinchlikka yetakchilik qilishda davom etishini ta’kidladi. "Turkiya mintaqasida va dunyoda tinchlik ovozini baland ko‘tarishda davom etadi," — dedi u.

Sulhning tafsilotlari

AQSH va Eron seshanba kuni ikki haftalik o‘t ochishni to‘xtatish bo‘yicha kelishuvga erishdilar. Bu kelishuv, agar murosa bo‘lmasa Eron infratuzilmasiga yirik zarbalar berish bilan tahdid qilgan Prezident Donald Tramp belgilagan muddat tugashiga sanoqli soatlar qolganda imzolandi.

Kelishuvning bir qismi sifatida:

AQSH va Isroil Eronga qarshi harbiy hujumlarini to‘xtatadi.

Tehron esa global neft ta’minoti uchun hayotiy yo‘lak hisoblangan Hormuz bo‘g‘ozini tijoriy kemalar qatnovi uchun to‘liq ochadi.

Ushbu muvaqqat sulh Tramp tomonidan "ishlash mumkin bo‘lgan asos" deb atalgan Eronning 10 moddadan iborat taklifini muhokama qilishga yo‘l ochadi. Yanada keng qamrovli va uzoq muddatli tinchlik bitimini ko‘zlovchi muzokaralar yaqin kunlarda Islomobodda boshlanishi kutilmoqda.