Isroil hujumi oqibatida falastinlik yana bir kishi halok bo‘ldi

G‘azoning shimoli va markaziy hududlarida Isroil tomonidan ochilgan o‘t natijasida falastinlik bir kishi halok bo‘ldi, yana biri og‘ir yaralandi.

Yakshanba kuni tibbiy manbalar bergan ma’lumotga ko‘ra G‘azoning shimolidagi Jabaliya sharqida joylashgan Halava lagerida ko‘chirilgan tinch aholi yashayotgan chodirlarga Isroil harbiy texnikalari tomonidan o‘q uzilishi oqibatida falastinlik bir kishi hayotdan ko‘z yumdi.

Markaziy G‘azoda, Dayr al - Balahning Tahlia hududida esa 16 yoshli o‘smir Isroilga tegishli insonsiz havo transporti zarbasi natijasida og‘ir yaralanib, al - Aqso shahidlari shifoxonasiga yetkazildi.

Bu voqealar 2025 - yilning oktabr oyidan beri Falastin hududida kuchga kirgan o‘t ochishni to‘xtatish kelishuvining Isroil tomonidan davom etayotgan buzilishlarining navbatdagi misoli sifatida qayd etildi.

Mahalliy manbalar, shuningdek, Isroil armiyasiga tegishli texnika va vertolyotlar markaziy viloyatning sharqiy hududlariga ham o‘t ochganini ma’lum qildi.

G‘azoning janubida esa Isroil artilleriyasi Xon Yunus shahrining sharqiy hududlarini o‘qqa tutdi, shu bilan birga harbiy texnika va vertolyotlardan kuchli o‘t ochildi. Dengiz kuchlariga tegishli kemalar ham shahar qirg‘oqlarini artilleriya snaryadlari va og‘ir pulemyotlardan o‘qqa tutdi.

Isroil o‘t ochishni to‘xtatishni 2 400 marta buzdi

Seshanba kuni G‘azo hukumati Media ofisi bayonot berib, Isroil hozirgacha o‘t ochishni to‘xtatish kelishuvini 2 400 marta buzgani; bu holatlar qatoriga o‘ldirishlar, hibsga olishlar, davom etayotgan qamal va ochlikka mahkum etish siyosati kirishini ma’lum qildi.

Davom etayotgan buzilishlar G‘azo Sog‘liqni saqlash vazirligi ma’lumotlariga ko‘ra 773 falastinlikning o‘limiga, 2 171 kishining esa jarohatlanishiga sabab bo‘lgan.

O‘t ochishni to‘xtatish kelishuvi 2023 - yilning oktabr oyida boshlangan va ikki yil davom etgan, Isroilning G‘azoga qarshi genotsid sifatida baholangan urushidan so‘ng erishilgan edi. Ushbu hujumlarda 72 000 nafardan ortiq falastinlik halok bo‘lgan, 172 000 nafardan ortig‘i yaralangan. Bu halokatli hujumlar katta vayronagarchilikka olib kelib, G‘azodagi infratuzilmaning 90 foiziga ziyon yetkazgan.