Eron Ummonga xavfsizlik sohasidan yuqori darajali vakil yubordi

Eron xavfsizlik sohasining eng yuqori darajali rasmiylaridan biri seshanba kuni (10.02.2026) Ummoniga rasmiy tashrif uyushtirdi. Mazkur tashrif Tehron bilan Vashington yadroviy masalalar bo‘yicha bilvosita muzokaralar yangi bosqichga yaqinlashayotgan bir paytda, yopiq diplomatiya faollashganidan dalolat bermoqda.

Eron Oliy Milliy xavfsizlik kengashi kotibi Ali Larijoniyning Ummon Sultoni Haysam bin Tarik va Tashqi Ishlar vaziri Badr bin Hamad al - Busaidiy bilan uchrashishi rejalashtirilgan. IRNA davlat axborot agentligi xabariga ko‘ra uchrashuvlarning rasmiy kun tartibi mintaqaviy va xalqaro voqealar hamda Eron – Ummon iqtisodiy hamkorligini o‘z ichiga oladi.

Tashrif juma kuni Maskatda o‘tkazilgan Eron – AQSh bilvosita muzokaralari ortidan uyushtirildi. Ushbu uchrashuvlar iyun oyida yuz bergan va AQShning Eron hududidagi uchta yadroviy obyektga qarshi uyushtirgan hujumlarini ham o‘z ichiga olgan 12 kunlik Eron – Isroil urushidan keyin to‘xtab qolgan muzokaralardan beri ilk aloqa hisoblanadi.

Eron ommaviy axborot vositalari Larijoniyning kun tartibi haqida batafsil ma’lumot bermaganiga qaramay manbalar uning navbatdagi muzokaralar bosqichining tuzilishi, jadvali va o‘tkaziladigan joyi bo‘yicha ummonlik o‘rtamchilar bilan yaqin hamkorlikda ishlashi kutilayotganini bildirdi.

Yangilangan ushbu aloqalar qariyb sakkiz oylik diplomatik turg‘unlik ortidan, notinch mintaqaviy sharoitda har ikki tomon ham muzokaralarga qaytish yo‘llarini ehtiyotkorlik bilan izlayotganidan dalolat beradi.