Tehron minglab kishilar halok bo‘lgan namoyishlardan so‘ng tergov komissiyasi tuzdi

Eron hukumati juma kuni mamlakatdagi hayot qimmatlashuviga qarshi boshlanib, keyinchalik hukumatga qarshi namoyishlarga aylangan va minglab kishilarning o‘limiga sabab bo‘lgan tartibsizliklarni o‘rganish uchun tergov komissiyasi tuzilganini e’lon qildi.

Eron hukumati matbuot kotibi Fotima Muhajiraniy mahalliy "ISNA" axborot agentligiga bergan bayonotida: "Tegishli muassasalar vakillaridan iborat tergov komissiyasi tuzildi va ushbu komissiya hujjatlarni hamda guvohlarning ko‘rsatmalarini to‘plamoqda", – dedi.

Matbuot kotibi komissiya faqat namoyishlarga sabab bo‘lgan iqtisodiy talablarni o‘rganishi yoki namoyishlar paytidagi o‘lim holatlarini ham tadqiq qilishi borasida aniqlik kiritmadi. Muhajiraniy: "Jarayon yakunlangach, yakuniy hisobot jamoatchilikka e’lon qilinadi va boshqa huquqiy choralar ko‘riladi", – deya qo‘shimcha qildi.

Payshanba kuni hukumatning internet saytida Prezident Mas’ud Pezeshkiyonning "Voqealarning sabablarini o‘rganish uchun guruhlarni safarbar qildik" degan so‘zlari nashr etildi, biroq boshqa tafsilotlar berilmadi.

Dekabr oyi oxirlarida boshlanib, 8-yanvardan so‘ng kuchaygan namoyishlar rasmiy ma’lumotlarga ko‘ra 3000 dan ortiq kishining o‘limiga sabab bo‘ldi. Eron rasmiylari halok bo‘lganlarning aksariyati Isroil va AQSH uchun ishlaydigan "terrorchilar" tomonidan o‘ldirilgan xavfsizlik kuchlari yoki tinch aholi ekanini da’vo qilmoqda.

Biroq Eron tashqarisida faoliyat yuritadigan inson huquqlari himoyachilari xavfsizlik kuchlari namoyishchilarni nishonga olganini ilgari surmoqda. AQSHda joylashgan Inson huquqlari faollari axborot agentligi (HRANA) namoyishlarning eng qizg‘in davrida kamida 7005 kishi halok bo‘lganini bildirdi.

Hukumat saytida e’lon qilingan hisobotga ko‘ra, Pezeshkiyon: "Bunday ayanchli voqealar yuz berganidan uyalamiz", – deb aytgan.