Otashkesim kelishuviga qaramay Isroil yana Gʻazoning sharqiga qarshi hujum uyushtirdi

Isroil armiyasi bugun (30.11.2025) ertalab Gʻazoning turli hududlarida harbiy nazorat ostidagi «sariq zona»da havo hujumlari uyushtirib, bir qator binolarni portlatdi.

Mahalliy manbalar va guvohlarning Anadoʻlu agentligiga bergan ma’lumotlariga koʻra Isroil jangovar samolyotlari Rafohning bir nechta nuqtalarini nishonga oldi, harbiy - dengiz kuchlariga tegishli kemalar esa shahar sohiliga oʻq uzgan.

Rafohning shimoli - sharqidagi Morag yoʻlagi atrofida joylashgan Isroil zirhli texnikalari hududda tintuv ishlari olib borar ekan, kuchli oʻq yogʻdirgani aytildi.

Guvohlarning soʻzlariga koʻra Isroil artilleriyasi Xon Yunusning sharqini nishonga olgan, vertolyotlar esa uylarni portlatish amaliyotlarini yuritib, binolarga zarba bergan.

Anadoʻlu axborot agentligi muxbiri esa markazdagi Dayr al - Balah mintaqasida joylashgan al - Burayj qochqinlar lagerining sharqiy qismi ham Isroil havo hujumi orqali nishonga olinganini bildirdi.

Gʻazo shahri bilan Jabaliyaga qarshi kuchli oʻq yogʻdirildi

Shimoliy Gʻazoda Isroil hujumlari Gʻazo shahrining sharqini nishonga oldi. Jabaliyaning sharqidan esa Isroil vertolyotlari tomonidan kuchli oʻq uzilgani ma’lum qilindi. Hozircha voqea oqibatida qurbonlar bor yoki yoʻqligi haqida hech qanday ma’lumot yoʻq.

Oʻt ochishni toʻxtatish boʻyicha tuzilgan kelishuvga amal qilinmayapti

Gʻazo hukumati ma’lumotlariga koʻra, Isroil, falastinlik Hamas guruhi bilan imzolangan oʻt ochishni toʻxtatish kelishuviga qaramay qoidabuzarlikni davom ettirmoqda. Joriy yilning 10 - oktabridan beri taxminan 500 ta qoidabuzarlik qayd etilgan va oqibatida falastinlik 354 kishi halok boʻlgan.

Urushning insoniy oqibatlari

2023 - yilning oktabr oyidan beri Isroil armiyasi Gʻazoda 70 ming nafardan ortiq inson umriga zomin boʻlgan. Ularning koʻpchiligi ayollar va yosh bolalardan iborat. Jon berganlardan tashqari qariyb 171 ming nafar inson tan jarohati olgan. Urush 2 yildan ortiq vaqtdan beri davom etar ekan, Gʻazoning yirik qismini vayronaga aylantirdi.