Livan Isroil tajovuziga qarshi armiyani safarbar qilishni buyurdi
Livan prezidenti hokimiyat binosiga qilingan hujumda bir kishi halok bo'lganidan so'ng, armiyaga Isroilning ehtimoliy hujumlariga javob berishga buyruq berdi.
Prezident Jozef Avn payshanba kuni armiya qo‘mondoniga Isroil kuchlarining janubiy Livanga qarshi har qanday hujumini to‘xtatish haqida ko‘rsatma berdi. Bu bayonot Isroil askarlari Livanning janubidagi Blida qishlog‘iga bostirib kirib, hokimiyat binosida ishlovchi bir xodimni o‘ldirgan kechki reyddan so‘ng berildi.
Livan davlat axborot agentligi NNA xabariga ko‘ra, Isroil askarlari Marjayun mintaqasidagi Blida qishlog‘iga harbiy va yer transport vositalari bilan kirib, chegaradan taxminan bir kilometr ichkarilab borgan. Bu hodisa “xavfli va misli ko‘rilmagan tajovuz” deb baholandi.
Isroil askarlari tungi soat 01:30 da (2330 GMT) Blida hokimiyat binosiga bostirib kirgan va bir xodimni o‘ldirgan. Mahalliy aholi soat 04:00 gacha (0200 GMT) binodan qichqiriq va yordam chaqiriqlarini eshitganini bildirgan. Livan armiyasi Isroil askarlari orqaga chekkanidan so‘ng halok bo‘lgan xodimning jasadini kasalxonaga olib ketdi. Isroil armiyasi esa bu xabar yuzasidan izoh bermadi.
Isroil armiyasining Livanga qarshi 2023 yil oktyabrda boshlangan, 2024 yil sentyabrda to‘liq miqyosli bosqin shaklini olgan hujumlarida 4 mingdan ortiq kishi halok bo‘lgan, qariyb 17 ming kishi yaralangan. 2024 yil noyabr oyida Hizbulloh va Isroil o‘rtasidagi bir yillik chegara to‘qnashuvlaridan so‘ng sulh imzolangan edi. Biroq Isroil bu sulhni 4 ming 500 martadan ortiq buzdi.
Sulh shartlariga ko‘ra, Isroil armiyasi 2025 yil yanvarida janubiy Livandan to‘liq chiqib ketishi kerak edi, biroq faqat qisman chiqdi va chegara bo‘ylab joylashgan besh qarorgohda harbiy mavjudligini saqlab qolmoqda.