Charli Kirkning qotili o'z aybiga iqror bo'lmayotir
Yuta gubernatori Spenser Koks Charli Kirkni o'ldirgan Tayler Robinsonga nisbatan rasman ayblov e'lon qilinishini aytdi.
Yuta shtatining gubernatori Spenser Koks yakshanba kuni ma'lum qilishicha, faol Charli Kirkning o‘ldirilishida ayblanib hibsga olingan shaxs Tayler Robinson, tergovchilar bilan hamkorlik qilmayapti. Ammo tergovchilar uning do‘stlari va oila a’zolari bilan suhbatlashib, otishma sababini aniqlashga harakat qilishmoqda.
Koksning aytishicha, 22 yoshli Robinson seshanba kuni rasmiy ravishda ayblanadi. U hozirda Yutada hibsda saqlanmoqda.
Tergovchilar hali ham Robinsonning chorshanba kuni Yuta Valley Universitetida ochiq havoda o‘tkazilgan tadbirda tomga chiqib, uzoq masofadan Kirkning bo‘yniga o‘q uzganiga sabab nima bo‘lganini aniqlashga harakat qilishmoqda.
Bu voqea Qo‘shma Shtatlarda siyosiy zo‘ravonlikning kuchayishi va chap hamda o‘ng qanot o‘rtasidagi bo‘linishning chuqurlashishi haqidagi xavotirlarni kuchaytirdi.
Robinson tergovchilarga iqror bo‘lmagan, dedi Koks ABC telekanalining "This Week" dasturida.
"U hamkorlik qilmayapti, lekin uning atrofidagi barcha odamlar hamkorlik qilmoqda, va bu juda muhim, deb o‘ylayman," dedi respublikachi gubernator.
Koksning aytishicha, tergovchilar bilan suhbatlashayotganlardan biri Robinsonning xonadoshi va romantik sherigi bo‘lgan shaxsdir. Bu haqda FBI ma’lumot bergan.
Tergovchilar to‘rtta o‘q gilzalarida yozilgan xabarlarni topishdi, ular orasida memlar va video o‘yinlarga oid hazillar bor edi. Ish bo‘yicha rasmiy hujjatda bu xabarlar tasvirlangan.
Hujjatga ko‘ra, yozuvlardan biri shunday edi: "Hey fashist! USHLA!" va undan keyin yo‘nalish o‘qlarining kombinatsiyasi, bu Sony kompaniyasining mashhur "Helldivers 2" video o‘yinidagi bomba tashlash tugmalar ketma-ketligiga ishora qilgan.
'Chap qanot g‘oyalari'
Amerikaliklarni siyosiy muhitni yumshatishga chaqirganligi uchun maqtovga sazovor bo‘lgan Koks yakshanba kuni AQSh telekanallarida chiqish qilib, NBC telekanalining "Meet the Press" dasturida tergovchilar Robinsonning chap qanot g‘oyalarini qabul qilganiga ishonishlarini aytdi.
"Bu qotilda chap qanot mafkurasi borligi aniq," dedi Koks.
Uning aytishicha, Robinson haqida bunday ma’lumot tergovchilarga "uning atrofidagi odamlar, oila a’zolari va do‘stlari" tomonidan aytilgan.
Koks CNN telekanaliga bergan intervyusida Robinsonning sherigining gender identifikatsiyasi Kirkning o‘ldirilishida qanday rol o‘ynaganini hali ham aniqlashayotganini aytdi.
Robinsonning sherigi haqidagi ma’lumot o‘ng qanot vakillarining g‘azabini keltirdi.