Kremlin matbuot kotibi Dmitriy Peskov Rossiya Turkiyaning Ukraina mojarosini hal etishga hissa qoʻshishga bo‘lgan istagini qabul qilayotganini aytdi.
Kreml matbuot kotibi Dmitriy Peskov Rossiya Turkiyaning Ukraina mojarosini hal etishga hissa qo‘shish istagini mamnuniyat bilan qabul qilayotganini aytdi.
Juma kuni Turkmaniston poytaxti Ashxobod shahrida o‘tkazilgan matbuot anjumanida so‘zlagan Peskov, Moskva Turkiya Prezidenti Rejep Tayyib Erdo‘g‘anning mojaro yuzasidan bildirgan fikrlarini ijobiy baholaganini ta’kidladi.
Peskov: “Prezident Turkiya vositachilik faoliyatini davom ettirish va tinchlik jarayoniga hissa qo‘shishga tayyor hamda bunga intilayotganini bildirdi. Bu esa mamlakatimiz tomonidan mamnuniyat bilan qarshi olinmoqda”, dedi.
Ashxobodda bo‘lib o‘tgan Xalqaro Tinchlik va Xavfsizlik Forumi doirasida Markaziy Osiyo yetakchilari Ukraina masalasini muhokama qilgan-qilmagani haqidagi savolga Peskov: “Deyarli umuman to‘xtalmadilar”, deya javob berdi.
Kreml vakili AQSh Prezidenti Donald Trampning ukrainalik va Yevropa Ittifoqi vakillari bilan uchrashuv o‘tkazadimi, degan savolga javoban Moskvaning bu borada ma’lumoti yo‘qligini bildirdi.
Tramp avvalroq, AQSh vakillari shanba kuni Yevropa va Ukraina vakillari bilan bo‘ladigan uchrashuvda faqatgina “yaxshi kelishuv ehtimoli bo‘lsa” ishtirok etishini aytgan edi.
Erdo‘g‘an Putin bilan uchrashdi
Turkiya Prezidenti Rajab Tayyib Erdo‘g‘an juma kuni Ashxobodda o‘tkazilgan Xalqaro Tinchlik va Xavfsizlik Forumi doirasida Rossiya Prezidenti Vladimir Putin hamda boshqa jahon yetakchilari bilan uchrashdi.
Turkiya Prezidentligi X platformasida e’lon qilingan ma’lumotlarga ko‘ra, Erdo‘g‘an Putin, Pokiston Bosh vaziri Shahboz Sharif va Turkmaniston Prezidenti Serdar Berdimuhammedov bilan ikki tomonlama muzokaralar olib bordi.
Shuningdek, Erdo‘g‘an forumdagi umumiy suratga tushish marosimidan oldin Eron Prezidenti Mas’ud Pezeshkiyon bilan ham qisqa uchrashuv o‘tkazdi.
Prezident Erdo‘g‘an amalga oshirgan ushbu uchrashuvlar Birlashgan Millatlar Tashkiloti Bosh Assambleyasining 2025-yilni “Xalqaro Tinchlik va Xavfsizlik Yili” deb e’lon qilgani hamda Turkmanistonning doimiy betarafligining 30 yilligi munosabati bilan tashkil etilgan forum doirasidagi diplomatik faoliyatning bir qismi hisoblanadi.
