Indoneziya, Tailand va Shri - Lankadagi yogʻingarchilik oqibatida halok boʻlganlar soni ortdi
Kuchli musson yomgʻirlari Indoneziya, Shri - Lanka, Tailand va Malayziyaning keng hududlarini vayron qildi; minglab inson boshpanasiz va asosiy ehtiyojlarsiz qolib ketdi.
Indoneziya, Tailand va Shri - Lanka rasmiylari vayronkor suv toshqinlari va koʻchkilar sabab 800 nafardan ortiq inson halok boʻlgan hududlarda vayronalarni tozalash hamda bedarak yoʻqolgan yuzlab insonni topish uchun safarbar boʻldi.
Ushbu hafta kuchli musson yomgʻirlari Indoneziya, Shri - Lanka, Tailand va Malayziyaning keng hududlarini vayron qildi; minglab inson boshpanasiz va asosiy ehtiyojlarsiz qolib ketdi.
Indoneziyada eng koʻp ziyon koʻrgan Sumatra orolining kamida ikki hududiga yakshanba kuni ham hanuz yetib borilmagani aytildi; rasmiylar yordam yetkazish uchun Jakarta shahridan ikki harbiy kema yuborilganini bildirdi.
Indoneziyada halok boʻlganlar soni 442 nafarga yetdi, 402 kishi haligacha bedarak yoʻqolganlar roʻyxatida.
Kamida 646 kishi tan jarohati olgani ma’lum qilindi.
Tailand
Tailandda soʻnggi oʻn yillikdagi eng yirik suv toshqinlaridan biri oqibatida kamida 170 kishi halok bo‘ldi; rasmiylar yordam yetkazish va vayronalarni tozalash ishlarini davom ettirmoqda.
Tropik boʻron vaziyatni yanada ogʻirlashtirdi va Indoneziya bilan Tailanddagi talafotlar soʻnggi yillarning eng yuqori koʻrsatkichlaridan biriga aylandi.
Iqlim inqirozi boʻronlarning davomiyligi va kuchi kabi omillarga ta’sir ko‘rsatib, yanada kuchli yogʻingarchilik, toʻsatdan sodir boʻladigan sel va kuchli shamol toʻlqinlariga yoʻl ochmoqda.
Shri - Lanka
Mahalliy OAV xabarlariga koʻra Falokatlarni boshqarish markazining ma’lumotiga binoan Shri - Lankadagi oʻlimlar soni 193 nafarga yetdi, 228 kishi bedarak yoʻqolgan.
Newswirening yozishicha orol 17 - noyabrdan beri kuchli ob - havo sharoitlaridan ziyon koʻrib kelmoqda va qutqaruv ishlari sel, koʻchki hamda keng koʻlamli vayronalar kuzatilgan koʻplab tumanlarda davom etmoqda.
Chorshanba kuni Siklon Ditvah Shri - Lankani urganidan beri mamlakat boʻylab 266 114 ta uyda jami 968 000 nafardan ortiq inson ziyon koʻrgan; 1 094 ta yordam markazi ishga tushirilgan bo‘lib, voqea yuz bergan hududdan evakuatsiya qlingan 147 ming nafardan ortiq insonga boshpana berilmoqda.