Avstraliyada qurolli hujum: kamida 3 kishi halok bo‘ldi, 1 kishi yaralandi, hujumchi qochib ketdi
Hodisa Yangi Janubiy Uels shtatining Leyk Kargelligo hududida yuz berdi. Politsiya hodisaning sabablarini hanuz o‘rganmoqda.
Avstraliya politsiyasi payshanba kuni Yangi Janubiy Uelsda sodir etilgan hujum oqibatida dastlabki ma’lumotlarga ko‘ra uch kishi halok bo‘lganini, bir kishi esa jarohat olganini ma’lum qildi. Yangi Janubiy Uels politsiyasi Leyk Kargelligo hududida uch kishi o‘ldirilgani haqidagi qurolli hujum xabari ortidan tergov boshlanganini bildirdi.
Taxminan 1 500 aholiga ega Leyk Kargelligo shaharchasidagi bir manzilga qurolli hujum haqidagi xabarlar kelib tushgach, favqulodda xizmatlar yuborilgani aytildi. Politsiya ma’lumotiga ko‘ra, voqea joyida ikki ayol va bir erkak halok bo‘lgan, yana bir erkak og‘ir, biroq barqaror ahvolda shifoxonaga yotqizilgan.
ABC News xabariga ko‘ra, hujumchi hozircha qo‘lga olinmagan va qochib yuribdi. Politsiya hodisaning sabablariga doir hozircha izoh bermadi.
Politsiya bayonotida shunday deyiladi: “Jamoatchilikdan hududdan uzoqroq bo‘lish so‘raladi, mahalliy aholidan esa uylarida qolishlari iltimos qilinadi.” Shuningdek, “Hodisa joyi xavfsizlik chizig‘i bilan o‘rab olingan va voqea sharoitlariga doir tergov boshlangan,” deya qo‘shimcha qilindi.