Turkiyada ayollarga nisbatan zo'ravonlikka chek qo'yiladi

Turkiya Respublikasi Oila va ijtimoiy xizmatlar vazirligi ayollarga nisbatan zo'ravonlikni ayolga jismoniy, jinsiy, psixologik yoki iqtisodiy zarar yetkazadigan qasddan qilingan harakatlar deb ta'riflaydi.

Bu kabi zo'ravonliklar uyda, ishda yoki jamiyatning istalgan joyida sodir bo'lishi mumkin.

Ayollarga nisbatan zo'ravonlik ayollarning asosiy huquqlarini, jumladan, yashash huquqi, shaxsiy xavfsizlik, jismoniy va psixologik yaxlitlik hamda iqtisodiy va ijtimoiy hayotda ishtirok etish huquqini buzadi.

Oila va ijtimoiy xizmatlar vazirligi tarkibidagi Ayollar maqomi bosh boshqarmasi Turkiyada ayollarga nisbatan zo'ravonlikka qarshi kurash bo'yicha milliy siyosat va strategiyalarni muvofiqlashtirishdan mas'uldir.

Vazirlik ixtisoslashgan institutsional xizmat bo'linmalariga ega.

Zo'ravonlikni oldini olish va monitoring markazlari (ŞÖNİM)

Zo'ravonlikni oldini olish va monitoring markazlari zo'ravonlikni oldini olish va himoya choralarini samarali amalga oshirish uchun monitoring va qo'llab-quvvatlash xizmatlarini ko'rsatadigan ijtimoiy xizmat tashkilotlari sifatida faoliyat ko'rsatadi.

Ushbu markazlar psixososyal yordam, huquqiy yordam, ta'lim, sog'liqni saqlash, iqtisodiy qo'llab-quvvatlash va zo'ravonlik qurbonlari uchun ayollar boshpanalariga joylashtirish kabi xizmatlarni ko'rsatadi.

Ushbu markazlar 81 ta viloyatda 86 ta tashkilot bilan faoliyat yuritadi.

Ayollar boshpanalari

Ayollar boshpanalari zo'ravonlik qurboni bo'lgan ayollar va ularning bolalarini himoya qilishga qaratilgan turar-joy ijtimoiy xizmat ko'rsatish muassasalaridir. Ushbu muassasalar boshpana berishdan tashqari, ayollarning psixososyal va iqtisodiy muammolarini hal qilish orqali ularning huquq va imkoniyatlarini kengaytirishga ham yordam beradi. Vazirlik qoshida 112 ta ayollar boshpanasi mavjud va ushbu xizmatlardan foydalanmoqchi bo'lganlar Zo'ravonlikni oldini olish va monitoring markazlari (ŞÖNİM) orqali murojaat qilishlari mumkin.

Ijtimoiy xizmat ko'rsatish markazining zo'ravonlikka qarshi aloqa punktlari

Vazirlik tuman darajasidagi Zo'ravonlikni oldini olish va monitoring markazlari bilan muvofiqlashtirilgan holda zo'ravonlik qurbonlariga yo'l-yo'riq va maslahat xizmatlarini ko'rsatishini va butun mamlakat bo'ylab 432 ta punkt faoliyat yuritayotganini ma'lum qildi. Shuningdek, jabrlanuvchilarni qo'llab-quvvatlash tizimlari ayollarga nisbatan zo'ravonlikka qarshi kurashda arizalar va favqulodda aralashuvlarga kirish imkonini berishi ta'kidlandi.

“Alo 183” zo'ravonlikka qarshi tezkor aloqa tarmog’i

Zo'ravonlik qurbonlariga shoshilinch aralashuv, ko'rsatma va maslahat xizmatlari 24/7 ishlaydigan Alo 183 ishonch telefoni orqali taqdim etiladi.

Ayollarni qo'llab-quvvatlash (KADES) mobil ilovasi

KADES - bu faqat ayollar uchun mavjud bo'lgan mobil ilova bo'lib, uni smartfonlarga yuklab olish mumkin. Ilovadagi "yordam so'rash" tugmasini bosgandan so'ng, eng yaqin huquqni muhofaza qilish organlari xodimi tezda jabrlanuvchining joylashgan joyiga yetib keladi.