YI, Google’ning SI ma’lumot foydalanishi ustidan raqobat tergovini ochdi
YI, Google’ning nashriyotlar va YouTube kontentini ruxsatsiz va to‘lovsiz sun’iy intellektni o‘qitish uchun ishlatgani iddosi bo‘yicha rasmiy tergov ochdi.
Yevropa Ittifoqi seshanba kuni media va boshqa nashriyotlar tomonidan onlaynda e’lon qilingan materiallarning yetarli kompensatsiya to‘lanmasdan sun’iy intellekt xizmatlarini o‘qitish va yaratishda ishlatilgan-yo‘qligini aniqlash maqsadida tergov boshlaganini e’lon qildi.
Yevropa Komissiyasi, tergovning AQSh texnologiya gigantining nashriyotlar va kontent yaratuvchilariga nohaq shartlar qo‘yib-qo‘ymaganini yoki ularning kontentiga imtiyozli kirish orqali raqobatni buzmaganini tekshirishini bildirdi.
Komissiyaning raqobat bo‘yicha mas’ul rasmiysi Teresa Ribera shunday dedi:
“Erkin va demokratik jamiyat turli media, ma’lumotga ochiq kirish va sermahsul ijodiy muhitga tayangan holda yashaydi. Sun’iy intellekt Yevropa bo‘ylab insonlar va bizneslar uchun mislsiz innovatsiyalar va katta foyda keltirmoqda, ammo bu taraqqiyot jamiyatlarimiz poydevoridagi tamoyillarning hisobiga bo‘lmasligi kerak.”
Komissiya YI raqobat nazoratchisi sifatida tergov ikki asosiy yo‘nalishga qaratilishini bildirdi:
1. YouTube kontentining SI o‘qitilishida qo‘llanilishi
Tergov Google’ning YouTube videolarini va onlayn yuklangan kliplarni kontent yaratuvchilariga yetarli to‘lov qilmasdan hamda ularga bunday foydalanishga rad javobi berish huquqini bermasdan generativ sun’iy intellekt modellarini o‘qitish uchun ishlatgan-yo‘qligini aniqlaydi.
Komissiya shunday dedi:
“Google, YouTube kontent yaratuvchilariga kontentlari uchun to‘lamaydi. Ularni YouTube’ga yuklashga ruxsat berar ekan, ayni paytda Google’ning bu ma’lumotlardan foydalanishini taqiqlash imkonini bermaydi. Raqobatchi sun’iy intellekt model ishlab chiquvchilar esa YouTube siyosatlari sabab YouTube kontentidan foydalanib o‘z modellarini o‘qita olmaydi.”
2. Onlayn manbalardagi matnlarning SI xizmatlarida qo‘llanilishi
Tergov Google’ning gazeta saytlari kabi boshqa onlayn kontentlardan generativ sun’iy intellekt bilan ishlaydigan xizmatlarni yaratishda kompensatsiya to‘lamasdan yoki voz kechish mexanizmini taqdim etmasdan foydalangan-foydalanmaganini ham tekshiradi.
Bunga, ayniqsa, qidiruv so‘rovlariga javoban ko‘rinadigan SI asosidagi tavsiyalar hamda Google’ning savollarga sun’iy intellekt orqali javob beruvchi “AI Mode” funksiyasi kiradi.
Ribera shunday dedi:
“Google nashriyotlar va kontent yaratuvchilarga nohaq shartlar qo‘yayotganini, raqobatchi sun’iy intellekt ishlab chiquvchilarini esa noqulay vaziyatga qo‘yayotganini tekshirmoqdamiz. Bu holat YI raqobat qoidalarining buzilishi bo‘lishi mumkin.”
Komissiyaning tergovni yakunlash uchun belgilangan muddati yo‘q, tergov ochilishi esa Google aybli deb topilishi degani emas. Biroq kompaniya katta jarimalar xavfi ostida qolishi mumkin.