Rossiya harbiylari dron vositasida Ukrainaga zarba berdi

Davlat favqulodda vaziyatlar agentligi Xarkov viloyatida diron hujumidan so‘ng bir ayol va 10 yoshli bolaning jasadi topilganini ma’lum qildi.

Ukraina rasmiylari tunda Odessa va Xarkovga qilingan Rossiya hujumlarida kamida uch kishi hayotdan ko‘z yumganini xabar qildi. Shahar harbiy ma’muriyati rahbari Sergey Lisakning so‘zlariga ko‘ra, Eron tomonidan ishlab chiqarilgan dironlar janubiy port shahri Odessaga zarba bergan, natijada yong‘inlar kelib chiqib, turar-joy binolari va gaz quvuriga zarar yetgan.

Lisak dushanba kuni bergan ma’lumotida: "Tungi hujum natijasida 35 yoshli erkak halok bo‘ldi. Ikki kishi, jumladan 19 yoshli qiz yaralandi", — deb yozdi. Viloyat gubernatori Oleg Kiper shaharning "keng ko‘lamli hujumga" uchraganini aytib, yong‘inlar sodir bo‘lganini tasdiqladi, biroq talafotlar haqida batafsil ma’lumot bermadi.

Tinchlik muzokaralariga qaramay bombardimonlar davom etmoqda

Shimolroqda, Xarkov viloyatida favqulodda vaziyatlar agentligi uchuvchisiz uchish qurilmasi (UUA) hujumidan so‘ng bir ayol va 10 yoshli o‘g‘il bolaning jasadini topganliklarini ma’lum qildi. Agentlik o‘zining Telegram kanalida: "Uch kishi jarohatlandi", — deya qo‘shimcha qildi.

Rossiya Ikkinchi jahon urushidan beri Yevropadagi eng qonli mojaroga barham berish maqsadida AQSH tomonidan qo‘llab-quvvatlanayotgan muzokaralarda ishtirok etayotgan bo‘lsa-da, Ukrainani bombardimon qilishda davom etmoqda.

Vashington yil o‘rtasiga qadar urush tugashini istamoqda, biroq Kiyev va Moskva hali ham hududiy masalalarda kelisha olmayapti. Rossiya Ukrainaning sharqidagi Donetsk viloyati ustidan to‘liq nazorat o‘rnatishni talab qilmoqda.