Netflix chekindi, Paramount Warner Brosni sotib olishga tayyorlanmoqda
So‘nggi o‘zgarishlar Paramount kompaniyasi CNN va Warner Bros. Discovery tarkibidagi boshqa boyliklarni qo‘lga kiritishga juda yaqinlashganini anglatadi.
Netflix kompaniyasi Warner Bros. Discovery uchun bergan taklifini oshirmasligini ma’lum qildi. Kelashuv moliyaviy jihatdan endi foydali emas degan qarorga kelganidan so‘ng, media gigantini Paramount Skydance’ning taklifiga qoldirdi. Raqamli efir gigantining rahbarlari Ted Sarandos va Greg Piters, Warner Bros. Discovery kengashi Paramount Skydance taklifini "Eng yaxshi taklif" deb e’lon qilganidan keyin, unga teng keladigan yangi taklif bermasliklarini aytishdi.
Ushbu voqea Gollivudning eng ko‘hna studiyasi va CNN kabi bir qator telekanallarning Paramount qo‘liga o‘tishiga hamda AQSH mediasining qayta shakllanishiga yo‘l ochishi mumkin. Netflix tomonidan qarshi taklif kelmagani sababli, Warner Bros. Discovery boshqaruvi endi Netflix bilan shartnomani bekor qilish va Paramount bilan davom etish huquqiga ega.
Dushanba kuni berilgan ushbu taklif, AQSH Prezidenti Donald Tramp ham o‘z so‘zini aytishni istayotgan va Oq uyning diqqat markazida bo‘lgan savdolarning so‘nggi bosqichi edi. Paramount’ning yangilangan taklifi har bir aksiya uchun 31,00 dollar naqd pulni o‘z ichiga oladi, bu esa kompaniyaning qiymatini taxminan 108 milliard dollar qilib belgilaydi. Shuningdek, Paramount agar shartnoma qonuniy sabablar bilan amalga oshmasa, 7 milliard dollar to‘lashni va Warner Bros. Discovery’ning Netflix’ga to‘laydigan 2,8 milliard dollarlik jarimasini qoplashni o‘z zimmasiga oldi.
Oracle’dan moliyaviy ko‘mak
Eng muhimi, taklif Oracle asoschisi Larri Ellisonning qo‘shimcha mablag‘ bilan ta’minlash va’dasini ham o‘z ichiga oladi. Paramount Skydance rahbari Devid Ellisonning otasi bo‘lgan Larri Ellison, o‘g‘lining bu yirik xaridini katta miqdorda moliyalashtirmoqda. Trampning ittifoqchisi bo‘lgan Larri Ellison, ham Paramount, ham Netflix orqali Oq uy bilan aloqalarni mustahkamlashga harakat qilmoqda.
Netflix uchun vaziyatni qiyinlashtirgan omillardan biri respublikachi deputatlarning qarshiligi bo‘ldi; ular platformani ba’zi ijtimoiy mavzulardagi kontentlari uchun ayblashdi, ammo Ted Sarandos bu ayblovlarni rad etdi. Ma’lumotlarga ko‘ra, Sarandos savdodan chiqishdan bir necha soat oldin Oq uyda rasmiylar bilan uchrashgan.
Paramount’ning g‘alabasi, Tramp tomonidan tez-tez tanqid qilinadigan CNN kanalining Ellisonlar oilasi nazoratiga o‘tishini anglatadi. Shu bilan birga, Paramount tarkibidagi CBS kanalida Oq uy istagan kadrlar almashinuvi yuz berayotgani haqidagi tanqidlar ham kun tartibiga chiqdi.