Pokistonda Eron rahbari o'limidan keyin qonli to'qnashuvlar

Pokiston hukumati dushanba kuni orduni vazifaga chaqirdi va Eron diniy rahbari Ali Xomanaiyning AQSH-Isroil qo'shma hujumida o'ldirilishi ortidan chiqqan qonli namoyishlar sababli shimoldagi Gilgit-Baltiston mintaqasining turli joylarida uch kunlik komandantlik soati e'lon qildi.

Mamlakat bo'ylab yakshanba kuni namoyishchilar va xavfsizlik kuchlari o'rtasida yuz bergan to'qnashuvlarda kamida 23 kishi halok bo'ldi va o'nlab kishi yaralandi. Bu holat rasmiylarning AQSH elchixonasi va konsulxonalari atrofida xavfsizlik choralarini kuchaytirishiga sabab bo'ldi.

To'qnashuvlar davomida kamida 11 namoyishchi va bir xavfsizlik xadimi o'lgan hamda 40 kishi yaralangan Gilgit, Skardu va Shigar mintaqalarida komandantlik soati joriy etildi. Mamlakatning savdo markazi Karochida, AQSH konsulxonasi oldida o'tkazilgan namoyishda 10 kishi halok bo'ldi va 60 dan ortiq kishi yaralandi. Poytaxt Islomobodda esa AQSH elchixonasiga qarab yurgan yana ikki namoyishchi o'ldirildi.

Hukumat, Xomanaiyning o'ldirilishini qoralovchi keng ko'lamli namoyishlar tufayli vaziyat yanada yomonlashishi mumkinligi haqida ogohlantirdi.

AQSH va Isroilning Eronga uyushtirgan hamda Xomanaiy bilan birga ko'plab yuqori lavozimli Eron rasmiylari o'ldirilgan hujumlaridan keyin mintaqaviy keskinlik shanba kuni tobora avj oldi. Tehron, Isroil va Fors ko'rfazi davlatlaridagi AQSH obektlarini nishonga olgan bir qator uchuvchisiz uchish apparatlari va raketa hujumlari bilan javob qaytardi.