Turkiya Respublikasi Prezidenti Rajab Toyyib Erdo‘g‘an Italiya Bosh vaziri Jorja Meloni bilan telefon orqali muloqot qildi. Suhbat chog‘ida ikki tomonlama munosabatlar, shuningdek, mintaqaviy va global masalalar muhokama qilindi.
Turkiya Prezidentining Kommunikatsiyalar boshqarmasi X ijtimoiy tarmog‘idagi bayonotiga ko‘ra, Prezident Erdo‘g‘an Turkiya Italiya bilan, avvalo, mudofaa sanoati sohasida, shuningdek, barcha yo‘nalishlarda hamkorlikni mustahkamlash ustida ishlayotganini ta’kidladi. U ikki davlat o‘rtasidagi munosabatlarni yanada yuqori bosqichga olib chiqish uchun yangi qadamlar tashlash muhimligini qayd etdi.
Bayonotda, shuningdek, Prezident Erdo‘g‘an kelasi hafta Anqarada bo‘lib o‘tadigan NATO Liderlar sammiti ittifoqchilar o‘rtasidagi birdamlikni yanada mustahkamlashiga umid bildirgani ma’lum qilindi. Italiya Bosh vaziri Melonining ham sammitda ishtirok etishi kutilmoqda.
NATOga a’zo 32 davlat va taklif etilgan 9 mamlakatdan jami 52 nafar davlat va hukumat rahbari ishtirok etadigan NATO Davlat va Hukumat Rahbarlarining 36-sammiti 7–8 iyul kunlari Anqarada bo‘lib o‘tadi.
Munosabatlar tobora chuqurlashmoqda
Turkiya va Italiya o‘rtasidagi savdo hajmi 2024-yilda 32,2 milliard AQSh dollariga yetdi. Shu asosda, 2025-yil aprel oyida Rimda bo‘lib o‘tgan sammitda ikki davlat o‘zaro savdo hajmini 40 milliard dollarga yetkazishni maqsad qilib belgilagan edi.
Italiya Turkiyaning eng muhim eksport bozorlaridan biri bo‘lib qolmoqda. Turkiyaning Italiyaga eksporti 2025-yilda 12,4 milliard dollarni tashkil etib, rekord darajaga yetdi.
Mudofaa sanoati sohasidagi aloqalar ham izchil rivojlanmoqda. Turkiyaning Baykar kompaniyasi va Italiyaning Leonardo kompaniyasi 2025-yilda uchuvchisiz texnologiyalar yo‘nalishida qo‘shma korxona tashkil etdi. Shu yilning iyun oyida esa Baykar Italiyaning aviatsiya kompaniyasi Piaggio Aerospaceni o‘z tarkibiga qo‘shib oldi.
Energetika sohasida ham Italiya Turkiyaning muhim hamkorlaridan biri bo‘lib qolmoqda. Mamlakat 2020-yildan buyon Kaspiy gazini Janubiy Italiyaga yetkazib berayotgan Janubiy gaz yo‘lagi tarkibidagi Trans-Adriatik quvur liniyasi (TAP) loyihasida ishtirok etmoqda.
So‘nggi ma’lumotlarga ko‘ra, Italiyada qariyb 50 ming nafar Turkiya fuqarosi istiqomat qiladi. 2025-yilda esa taxminan 740 ming nafar italiyalik sayyoh Turkiyaga tashrif buyurgan.
