Venesueladagi so‘nggi AQSh harbiy aralashuvidan keyin Yevropa Ittifoqiga a’zo 26 davlat xalqaro huquqqa hurmat ko‘rsatishga chaqirib, vazminlik va bosiqlikka da’vat etdi.
Yevropa Ittifoqining Tashqi ishlar va xavfsizlik siyosati bo‘yicha oliy vakili Kaja Kallas tomonidan yakshanba kechasi e’lon qilingan qo‘shma bayonotda shunday deyiladi: “Yevropa Ittifoqi inqirozning keskinlashuvining oldini olish va tinch yo‘l bilan yechim topilishini ta’minlash uchun barcha tomonlarni vazmin va ehtiyotkor bo‘lishga chaqiradi. YI har qanday holatda xalqaro huquq va BMT Nizomi tamoyillariga rioya qilinishi lozimligini eslatadi.”
Mazkur bayonot Vengriyadan tashqari 26 nafar a’zo davlat tomonidan qo‘llab-quvvatlanib, BMT Xavfsizlik Kengashi a’zolarining xalqaro xavfsizlik me’morchiligining asosiy ustuni sifatida xalqaro huquq tamoyillarini himoya qilish borasidagi “alohida mas’uliyati” qayd etildi.
Bayonotda: “YI bir necha bor Nikolas Maduroning demokratik yo‘l bilan saylangan prezident sifatidagi legitimligi yo‘qligini ta’kidlagan va mamlakat suverenitetiga hurmat qilgan holda, Venesuela yetakchiligida tinch demokratik o‘tish jarayonini qo‘llab-quvvatlagan. Venesuela xalqining o‘z kelajagini belgilash huquqiga hurmat ko‘rsatilishi shart”, — deyiladi. Shuningdek, uzluksiz hamkorlik orqali “xalqaro huquq, hududiy yaxlitlik va suverenitet tamoyillariga to‘liq rioya qilgan holda, xalqaro uyushgan jinoyatchilik va giyohvand moddalar kontrabandasiga qarshi kurashish zarurligi” alohida ta’kidlangan.
Bayonotda yana shunday deyiladi: “Biz AQSh bilan, shuningdek mintaqaviy va xalqaro hamkorlar bilan yaqin aloqadamiz; barcha manfaatdor tomonlar o‘rtasidagi muloqotni qo‘llab-quvvatlash va yengillashtirish ustida ishlayapmiz. Bu muloqot venesuelaliklar yetakchiligida muzokara qilingan, demokratik, inklyuziv va tinch yechimga olib borishi kerak.”
AQSh harbiy aralashuvi
Bayonotda, shuningdek, Venesuela xalqining “demokratiyani qayta tiklash va mavjud inqirozni hal etish” irodasiga hurmat ko‘rsatish chaqirig‘i yangradi. Unda: “Hozirda Venesuelada hibsda saqlanayotgan barcha siyosiy mahbuslar so‘zsiz ozod qilinishi lozim. YI a’zo davlatlarining konsullik idoralari Venesuelada, jumladan noqonuniy ravishda ushlab turilgan YI fuqarolarining xavfsizligini ta’minlash maqsadida yaqin hamkorlikda ishlamoqda”, — deyiladi.
Bayonot AQSh prezidenti Donald Trampning AQShning Venesuelaga qarshi harbiy amaliyoti Nikolas Maduro va uning rafiqasi Siliya Floresning qo‘lga olinishi bilan yakunlanganini aytganidan so‘ng e’lon qilindi. Tramp, shuningdek, zarurat tug‘ilsa, AQSh qo‘shinlari orqali mamlakat ustidan vaqtincha Amerika nazoratini o‘rnatish mumkinligini bildirdi.
Maduro va Flores shanba kuni kechqurun Nyu-Yorkka yetib kelishdi va hozirda Bruklindagi bir hibsxonada saqlanmoqda. Ular giyohvand moddalar kontrabandasi bilan bog‘liq hamda terrorchi tashkilot sifatida tasniflangan jinoiy guruhlar bilan hamkorlik qilganlik haqidagi AQSh federal ayblovlariga duch kelmoqda.
Maduro bu ayblovlarni rad etmoqda, Venesuela poytaxti Karakasdagi rasmiylar esa juftlikni ozod qilishni talab qilmoqda.
