Eron sud hokimiyatining media organi Mizan tomonidan chorshanba kuni (07.01.2026) xabar berilishicha, Eron Isroil foydasiga josuslik qilganlikda aybdor deb topilgan bir kishini qatl qildi. Sudlanuvchining ismi Ali Ardestoniy ekani qayd etildi.
O‘n yillardan buyon Isroil bilan yashirin ravishda urush holatida bo‘lib kelayotgan Eron, Isroil razvedka xizmati bilan aloqadorlikda va mamlakat ichida amaliyotlarni amalga oshirishga ko‘maklashganlikda ayblagan bir qator shaxslarni qatl qildi.
Mizanning bayonotida aytilishicha, Ali Ardestoniy Eronga oid yashirin ma’lumotlarni Mossad razvedka xizmati foydasiga yetkazish orqali josuslik qilgani uchun olgan o‘lim jazosi Oliy sud tasdiqi va barcha qonuniy tartib - taomillar yakunlangach ijro etilgan.
Uzoq yillardan beri dushman bo‘lib kelayotgan ikki davlat o‘rtasidagi keskinlik kuchaygani sari, Isroil foydasiga josuslik qilganlikda ayblangan eronliklarning qatl qilinishi holatlari ko‘paygani kuzatilmoqda.
Uzoq yillardan beri davom etgan yashirin hujumlar, kiberamaliyotlar va vakolatli kuchlar orqali olib borilgan to‘qnashuvlardan so‘ng, o‘tgan yilning iyun oyida AQSh ko‘magida Isroilning Eron yadroviy inshootlariga zarba berishi ortidan ikki tomon o‘rtasidagi qarama - qarshilik to‘g‘ridan - to‘g‘ri to‘qnashuvga aylanib ketdi.
Shundan buyon Eron rasmiylari josuslik faoliyatini jilovlash, mintaqadagi keskinlik paytda milliy xavfsizlikni mustahkamlash maqsadida, Mossad bilan hamkorlik qilishda ayblangan shaxslarni qo‘lga olish va ularni qatl qilish holatlarining keskin ortishini o‘z ichiga olgan ichki xavfsizlik choralarini kuchaytirdi.
