Turkiya Respublikasi madaniyat va turizm vaziri Mehmet Nuri Erso’y, Egey dengizining Termayik qo‘ltig‘idagi Yunonistonning port shahri Salonikka restavratsiya qilingan Ataturk uy muzeyini ochdi.
Erso’y ochilish marosimida shunday dedi: “Ataturkga sadoqat ko‘rsatish — bu Respublika qadriyatlariga sodiq qolish, ularni asrash va yurtimiz hamda kelajagimiz oldidagi mas’uliyatni his qilishdir.”
Vazir ta’kidladi: Ataturk faqat davlat arbobi emas, balki xalq yuragida o‘chmas iz qoldirgan buyuk yetakchidir; uy-muzeyning restavratsiyasi esa uning xotirasiga bo‘lgan hurmat va sadoqat ifodasidir.
Erso’y Prezident Rajab Toyyib Erdo‘g‘an rahbarligida Turkiya demokratiya, mustaqillik, erkinlik va respublikaga sodiqligini davom ettirayotganini qayd etdi. Unga ko‘ra, Ataturk tug‘ilgan uy oddiy bino emas, balki Respublika sari yurishning birinchi qadamlari boshlangan joydir.
Madaniy merosni asrash
Erso’y vazirlik 2022-yilda keng ko‘lamli restavratsiya va ekspozitsiya ishlari boshlanganini va bu jarayonni 2024-yil 19-dekabrdan beri shaxsan kuzatib borayotganini aytdi.
1953-yilda muzeyga aylantirilgan holatiga mos tarzda restavratsiya qilingan Ataturk uyida yangilangan xonalar, etnografik ko‘rgazmalar, kutubxona hamda Ataturk biografiyasini yorituvchi bo‘limlar joy olgan.
Turkiyaning madaniy merosni asrash borasidagi qat’iy pozitsiyasini urg‘ulagan Erso’y, Salonikdagi Ataturk uyi bu sa’y-harakatlarning yorqin namunasi ekanini ta’kidladi. U, shuningdek, Prezident Erdo‘g‘anning so‘zlarini eslatdi: “Bu uy Turkiya bilan Yunoniston o‘rtasidagi tinchlikning ramzi bo‘lishi kerak.”
Yunoniston turizm vaziri o‘rinbosari Anna Karamanli esa Ataturk uyining ochilishi ikki tomonlama aloqalarni mustahkamlash va yaxshi qo‘shnichilikni rivojlantirish uchun muhim imkoniyat ekanini qayd etdi.
