"Axios" nashrining xabar berishicha, AQSh Prezidenti Donald Tramp Isroil Bosh vaziri Binyamin Netanyaxuning Turkiyaga F-35 qiruvchi samolyotlarini sotish rejasi yuzasidan bildirgan tanqidiy munosabatidan keskin norozi bo‘lgan.
Oq uyning ikki rasmiysiga tayanib berilgan ma’lumotlarga ko‘ra, Netanyaxuning Tramp Anqaraga safari oldidan "Fox News" telekanaliga bergan intervyusida mazkur kelishuvni qoralashi Vashingtonda katta g‘azab uyg‘otgan. Tramp o‘z atrofidagilarga Isroil Bosh vazirining qurol savdosiga ommaviy tarzda aralashishga "hech qanday haqqi yo‘q"ligini aytgan.
Ekspertlar buni ikki ittifoqchi o‘rtasidagi aloqalar sovuqlashayotganining navbatdagi belgisi sifatida baholamoqda. Ta’kidlash joizki, Vashington Turkiya bilan mudofaa sohasidagi aloqalarni tiklash, jumladan, S-400 tizimi tufayli joriy etilgan sanksiyalarni bekor qilish hamda F-35 bo‘yicha muzokaralarni yangilash niyatida.
Mazkur kelishmovchiliklar ortidan Tramp va Netanyaxu o‘rtasida uchrashuv rejalashtirilmagani diqqatga sazovor. Garchi Isroil matbuotida Netanyaxuning Vashingtonga safari haqida xabarlar tarqalgan bo‘lsa-da, Oq uy buni tasdiqlamadi. Isroil tomoni esa safar AQSh senatori Lindsi Gremning dafn marosimi kechiktirilishi sabab bekor qilinganini ma’lum qildi.
Tahlilchilar Vashington va Tel-Aviv o‘rtasidagi ixtilofning yanada kengayayotganini ta’kidlamoqda. Xususan, Isroil rasmiylari F-35 savdosi mintaqaviy harbiy muvozanatni buzishidan xavotirda bo‘lsa, AQSh Turkiya bilan strategik sheriklikni qayta tiklash tarafdori.
Vaziyat fonida AQSh vitse-prezidenti J. D. Vansning yaqinda bildirgan fikrlari ham e’tibor tortadi. U Isroil hukumatidagi ayrim vakillarni Vashingtonning Eron bilan diplomatik sa’y-harakatlariga to‘sqinlik qilishda va mintaqadagi harbiy mojarolarni cho‘zishda ayblagan edi.
