Eron terma jamoasi Jahon chempionatidagi ochilish oʻyinida ikki bor hisobda ortda borayotganiga qaramay, muvozanatni tiklashga erishdi va Yangi Zelandiya bilan 2:2 hisobida durang qayd etdi. Uchrashuv dastlabki daqiqalardan to yakuniy hushtakgacha hujumkor va keskin kurashlarga boy kechdi.
Yangi Zelandiya terma jamoasi 7-daqiqadayoq hisobni ochdi: Kris Vud (Chris Wood) tomonidan yetkazib berilgan uzatmani Elayja Jast (Elijah Just) jarima maydonchasi ichidan darvozaga yoʻlladi.
Eronliklar 32-daqiqada munosib javob qaytarib, muvozanatni tiklashdi — Ramin Rizoyan (Ramin Rezaeian) yaqin masofadan toʻpni darvozaga joylab qoʻydi. Bu gol Los-Anjelesdagi toʻlib-toshgan stadionda jamoani faol qoʻllab-quvvatlayotgan koʻp sonli eronlik muxlislarni hayajonga soldi.
Oʻyinda ajralib turgan Shotlandiyaning "Motherwell" klubi qanot yarim himoyachisi, 26 yoshli Jast 54-daqiqada Yangi Zelandiyani yana hisobda oldinga olib chiqdi. U yana oʻsha Kris Vudning pasidan unumli foydalanib, toʻpni darvozabon Alireza Beyranvand (Alireza Beiranvand) ustidan oshirib, darvozaga joyladi.
Biroq oradan 10 daqiqa oʻtib, Eron yana bir bor javob qaytarishga muvaffaq boʻldi: Muhammad Muhebbi (Mohammad Mohebbi) uzoq ustun yaqinida toʻpga bosh bilan zarba berib, darvozani aniq nishonga oldi va hisobni 2:2 koʻrinishiga keltirdi.
Eron terma jamoasi "G" guruhidagi navbatdagi oʻyinini oʻtkazish uchun Los-Anjelesga qaytadi va u yerda Belgiyaga qarshi maydonga tushadi. Yangi Zelandiya esa yakshanba kuni Vankuverda Misr bilan bahs olib boradi. Maʼlumot uchun, dushanba kuni guruhning boshqa bir uchrashuvida Belgiya va Misr terma jamoalari oʻrtasidagi oʻyin 1:1 hisobidagi durang bilan yakunlangan edi.
Diqqatga sazovor tomoni, ushbu turnir davomida Eron terma jamoasi oʻzining tayyorgarlik bazasini Arizonadan Meksikaning Tixuana shahriga koʻchirdi. Jamoa har bir oʻyin boshlanishidan bir kun avval AQShga uchib kelmoqda va uchrashuv yakunlanishi bilan yana Meksikaga qaytib ketmoqda.
