Kuchli zilzila va gaz portlashi bo‘lgani taxmin qilinayotgan hodisadan so‘ng Kumamotoda qulab tushgan savdo markazi vayronalari ostida qolganlarni qidirish ishlari davom etar ekan, Yaponiyada zilzila oqibatida halok bo‘lganlar soni payshanba kuni 30 nafarga yetdi.
Seshanba kuni sodir bo‘lgan 7,1 magnitudali zilziladan taxminan 50 daqiqa o‘tib kuchli portlash yuz bergan “Aeon” savdo markazida favqulodda vaziyatlar guruhlari qutqaruv ishlarini davom ettirmoqda. Bosh vazir Sanae Takaiti qurbonlar soniga oid yangilangan ma’lumotni tasdiqladi.
Tabiiy ofat mas’ullarining bildirishicha, qutqaruvchilar hozirgacha vayronalar ostidan 10 kishini olib chiqqan. Ulardan to‘rt nafari halok bo‘lgani tasdiqlangan, bir kishida hayot alomatlari aniqlanmagan. Qolgan besh kishi esa yengildan og‘irgacha bo‘lgan darajada jarohatlangan.
Zilzila uylarni yer bilan yakson qildi, ko‘priklarga zarar yetkazdi va yong‘inlarga sabab bo‘ldi. Dam olish kunlari havo harorati 38 darajagacha ko‘tarilishi kutilayotgan bir sharoitda o‘n minglab aholi elektr energiyasi va tarmoq suvisiz qoldi.
Omon qolganlarni qidirish ishlari davom etmoqda
Rasmiylar zilziladan darhol keyin savdo markazini evakuatsiya qildi. Biroq gaz portlashi bo‘lgani taxmin qilinayotgan hodisa binoni silkitib, unga zarar yetkazgan paytda ayrim xodimlar ichkarida qolgan bo‘lishi mumkinligi aytilmoqda.
Qutqaruv guruhlari omon qolgan yana ko‘proq kishilarga yetib borish umidida vayronalar orasida qidiruv ishlarini olib bordi.
Tabiiy ofat boshqa joylarda ham insonlar hayotiga zomin bo‘ldi. Rasmiylar Yatsushiro shahridagi “Nippon Paper Industries” zavodida mo‘rining bir qismi qulab tushishi oqibatida besh ishchi halok bo‘lganini va to‘rt kishi hamon bedarak yo‘qolganini tasdiqladi.
Issiq havo gumanitar inqirozni kuchaytirmoqda
Kuchli issiq to‘lqini paytida elektr energiyasi uzilishi oqibatida uylar konditsionersiz qoldi. Shu sababli o‘z yashash joylarini tark etishga majbur bo‘lgan minglab hudud aholisi jamoat markazlariga joylashdi.
Payshanba kuni ertalabki ma’lumotlarga ko‘ra, qariyb 22 ming 670 ta xonadon va obyektda elektr ta’minotidagi uzilishlar davom etmoqda. Taxminan 84 mingta uyda esa suv ta’minotida uzilishlar kuzatilmoqda.
Rasmiylar evakuatsiya markazlariga konditsioner qurilmalarini tarqatdi. Tabiiy ofatdan zarar ko‘rgan hududlarda yoqilg‘i va ichimlik suvi olish uchun uzun navbatlar yuzaga keldi.
Dunyoda zilzila xavfi eng yuqori bo‘lgan mamlakatlardan biri hisoblangan Yaponiya Tinch okeanining “Olov halqasi” hududida joylashgan. Mamlakatda har yili yuzlab zilzilalar sodir bo‘ladi.
