Aomori prefekturasining shimoli-sharqida, Yaponiyaning Oma qirg‘og‘ida tutilgan 243 kilogrammli ko‘k suzgichli orkinos Tokio markazli mashhur sushi restoranlari tarmog‘i Sushizanmaini boshqaruvchi Kiyomura Corp. tomonidan xarid qilindi.
Kyodo axborot agentligiga ko‘ra, Kiyomura kompaniyasi prezidenti Kiyoshi Kimura shunday dedi: “Yilning birinchi orkinosi omad keltiradi. Umid qilamizki, imkon qadar ko‘proq odamlar uni tatib ko‘rib, o‘zlarini quvvatga to‘la his qiladilar.”

Orkinos Sushizanmai’ning Tsukiji’dagi flagman filialida bo‘laklarga ajratiladi va mamlakat bo‘ylab joylashgan filiallarga yuboriladi. Rekord darajadagi narxiga qaramay, kompaniya orkinosni mijozlarga odatdagi narxda sotishini ma’lum qildi.

Tokio metropoliten ma’muriyati ma’lumotlariga ko‘ra, bu yilgi g‘olib taklif 1999 yildan buyon shunga o‘xshash auksionlar bo‘yicha ma’lumotlar yig‘ila boshlaganidan beri eng yuqori taklif bo‘ldi.

Auksionda turli xil orkinoslar namoyish etildi va xaridorlar hamda sotuvchilar o‘rtasidagi jonli muloqotlar bilan e’tiborni tortdi. Shuningdek, har yili o‘tkaziladigan ushbu tadbirni tomosha qilish uchun ko‘plab xorijiy sayyohlar ham tashrif buyurdi.

Auksionning birinchi sessiyasida xaridorlar an’anaga ko‘ra katta mablag‘lar sarflashadi, chunki bu omad keltiradi, deb ishoniladi va restoranlar uchun marketing imkoniyatidan foydalanish imkonini beradi.