Amerika Qo‘shma Shtatlarining (AQSh) Turkiyadagi elchisi Tom Barrack, Anqaraning F - 35 qiruvchi samolyotlari dasturida ishtiroki borasida uzoq vaqtdan beri davom etayotgan kelishmovchilikni “mantiqsiz” deb baholab, muammoni tezda hal etishga chaqirdi. Eng muhimi, bu bosqich har ikki davlat ham uzoq yillardan beri a’zo bo‘lgan NATO ittifoqini mustahkamlashini ta’kidladi.
Tom Barrack o‘tgan hafta oxirida Turkiyada o‘tkazilgan Antalya Diplomatiya Forumi doirasidagi chiqishlari ortidan, chorshanba kuni (22.04.2026) Fox News Digital - ga bergan izohida mavjud boshi berk ko‘chaga diplomatik yondashuv orqali yechim topish zarurligini qayd etdi.
Barrack Turkiya AQShning muhim obyektlariga mezbonlik qilayotgani, NATO missiyalariga hissa qo‘shayotgani va umumiy tahdidlarga qarshi kurashda muhim ittifoqchi bo‘lib qolayotganini yana bir bor ta’kidladi.
Shu bilan birga AQShning Suriya bo‘yicha maxsus vakili lavozimini ham egallab turgan Barrack, Turkiyaning Rossiyada ishlab chiqarilgan S - 400 havo mudofaa tizimini sotib olganidan keyin F - 35 dasturidan chiqarilgani ikki tomonlama munosabatlarga ortiqcha ziyon yetkazgani va bundan Rossiya foyda ko‘rganini bildirdi.
Barrackning aytishicha, S - 400 masalasi AQSh Davlat kotibi Marko Rubio boshchiligidagi tashabbuslar hamda AQSh Prezidenti Donald Tramp va Turkiya Respublikasi Prezidenti Rejep Tayyip Erdo‘g‘an o‘rtasidagi munosabatlarga tayangan holda bir necha oy ichida nozik diplomatiya orqali hal etilishi mumkin.
U Kongressdagi xavotirlarga ham to‘xtalib o‘tdi, jumladan senator Rik Skottning ehtimoliy qurol yetkazib berishlariga doir tanqidlari haqida gapirdi va har qanday kelishuv 2020 - yildagi Milliy mudofaa vakolatlari to‘g‘risidagi qonunning 1245 - moddasiga to‘liq mos kelishini ta’kidladi.
Barrackning so‘zlariga ko‘ra, bu Rossiyaning S - 400 tizimiga egalik qilish va uni faol holatda saqlash amaliyotining tekshiriladigan tarzda to‘liq yakunlanishini anglatadi.
AQSh Mudofaa vazirligi va Davlat departamentidan keladigan rasmiy sertifikatsiyalar F - 35 texnologiyasi uchun hech qanday xavf yo‘qligini tasdiqlashini ifoda etgan Barrack, Amerika xavfsizlik standartlarida hech qanday qisqa yo‘l bo‘lmasligini ta’kidladi.
Turkiyaning F - 35 ekotizimidagi ro‘li
Barrack yaqin orada ijobiy siljish bo‘lishini aytib, Turkiyaning F - 35 ekotizimidagi ro‘lini tiklash, NATO doirasida o‘zaro ishlash imkoniyatlarini kuchaytirish, AQSh sanoatini qo‘llab - quvvatlash va Rossiyaning qo‘lidagi ustunlikni kamaytirish imkoniyati yaqin ekanini bildirdi.
Uning aytishicha, bu yondashuv Trampning tashqi siyosati bilan uyg‘un bo‘lib, qonunlarning ijrosi, Amerika texnologiyasining himoyasi va AQSh kuchini mustahkamlaydigan ittifoqlarni qayta tiklashni anglatadi.
AQShning Anqaradagi elchisi Tom Barrack ushbu bayonotlarida amaldagi ma’muriyat tashqi siyosatini qo‘llab - quvvatlashini yana bir bor ta’kidlab, ular “kuch orqali tinchlik” tamoyiliga, vaziyatni ochiq baholashga va AQSh manfaatlarini himoya qilgan holda uni cheksiz mojarolarga tortib ketmaydigan natijalarga erishishga ishonishlarini bildirdi.
