Ukraina Favqulodda vaziyatlar xizmati shanba kuni ertalab bergan ma’lumotga ko‘ra, juma oqshomida Odessaning janubidagi port infratuzilmasiga Rossiya tomonidan berilgan raketa zarbasi natijasida 8 kishi hayotdan ko‘z yumdi, 27 kishi esa tan jarohati oldi.
Xizmat ma’lumotiga ko‘ra, yaralanganlarning ba’zilari hujum markazidagi avtobusda bo‘lgan. To‘xtash joyidagi yuk mashinalariga o‘t ketgan va boshqa transport vositalariga ham shikast yetgan. Odessa viloyati rahbari Oleh Kiper port ballistik raketalar bilan urilganini ma’lum qildi.
Boshqa tomondan, Kiyev ham Moskvaning neft infratuzilmasiga qarshi hujumlarini jadallashtirdi. Ukraina uchuvchisiz uchish apparatlari Kaspiy dengizida "Lukoyl" (Lukoil) kompaniyasiga tegishli neft platformasini va uning yaqinida patrullik qilayotgan "Okhotnik" harbiy patrul kemasiga zarba berganini e’lon qildi.
Mazkur kema Kaspiy dengizidagi neft va gaz qazib olish platformasi yaqinida navbatchilik qilayotgan edi. Bayonotda yetkazilgan zararning ko‘lami hali ham aniqlanayotgani aytilgan.
Ukraina Bosh shtabi ushbu hujum juma kuni amalga oshirilganini bildirdi. Bu so‘nggi haftalarda Kaspiy dengizidagi Rossiya burg‘ulash infratuzilmasini nishonga olgan bir qator hujumlardan biri bo‘lsa-da, Ukraina armiyasi tomonidan rasman tan olingan birinchi hujumdir.
Ukraina armiyasiga ko‘ra, hujum natijasida Filanovskiy neft platformasining burg‘ulash iskandasi shikastlangan. Ushbu iskanda dekabr oyi davomida kamida yana ikki marta dron hujumlariga uchragani xabar qilingan edi.
Shuningdek, Ukraina dronlari Rossiya tomonidan 2014-yilda noqonuniy ravishda anneksiya qilingan Qrimning Krasnosilske hududidagi radar tizimiga ham zarba berdi.
Ukraina tomoni Rossiyaning qariyb to‘rt yildan beri davom etayotgan keng ko‘lamli urushni moliyalashtirishiga xizmat qilayotgan neft infratuzilmasi qonuniy harbiy nishon ekanini aytmoqda.
Ukraina 2024 va 2025-yillar davomida Rossiya neftni qayta ishlash zavodlariga hujum qilib kelmoqda. So‘nggi haftalarda u o‘z operatsiyalarini sezilarli darajada kengaytirdi hamda Qora dengiz va O‘rta dengizdagi Rossiyaning "soya floti" tankerlariga qarshi dengiz dronlari orqali uyushtirilgan hujumlar uchun mas’uliyatni o‘z zimmasiga oldi.
