Turkiya Respublikasi Prezidenti Rejep Tayyip Erdo‘g‘an «26 - sentabr Turk tili bayrami» munosabati bilan yurtdoshlariga murojaat qildi. Unda turk tili xalq uchun shunchaki muloqot vositasi emasligini ta’kidlagan Erdo‘g‘an til ayni paytda tarix, madaniyat, boy madaniy va tarixiy merosimiz va umumiy xotiraning tashuvchisi ekaniga e’tibor qaratdi.
Turk tili minglab yillik boy tarixdan sayqallanib kelgan ulkan boylikka ega ekanini ta’kidlagan Prezident Erdo‘g‘an o‘z so‘zida quyidagi ifodalarga o‘rin berdi:
Turk tilimiz xalqimiz uchun shunchaki muloqot vositasi emas, balki tariximiz, madaniyatimiz, boy madaniy va tarixiy merosimiz hamda umumiy xotiramizni o‘zida mujassam etgan muhim vositadir. Ona tilimiz bo‘lgan turk tili minglab yillik chuqur tariximizdan bizgacha yetib kelgan ulkan boy madaniy va tarixiy merosimizni o‘zida mujassam etgan. Asrlar davomida turli geografiyalar va turli xalqlar bilan aloqalar natijasida boyib borgan turk tilimiz she’riyatdan adabiyotgacha, fandan san’atgacha hayotimizning barcha sohalarida xalqimizning his - tuyg‘ulari va fikrlarini ifoda etib kelgan.
«26 - sentabr Turk tili bayrami» munosabati bilan bizning vazifamiz turk tilimizni ajdodlardan qolgan ulkan meros sifatida asrab - avaylash, uni boyitish va kelajak avlodlarga imkon qadar mukammal yetkazishdir.
«O‘z tilini asragan xalq o‘z tarixi va kelajagini ham asraydi»
Turkiya asrini barpo etish jarayonida o‘z tilimiz, madaniyatimiz va sivilizatsion qadriyatlarimizni asrab - avaylash, global dunyoga o‘z so‘zimiz, o‘z tushunchalarimiz va o‘z sivilizatsion nuqtayi nazarimiz bilan hissa qo‘shish nihoyatda muhimdir. Turk tilidan to‘g‘ri, chiroyli va ehtiyotkorlik bilan foydalanishni keng targ‘ib qilish, farzandlarimiz va yoshlarimizning tilimizga bo‘lgan mehrini kuchaytirish barchamizning umumiy mas’uliyatimizdir. Unutmaylikki, o‘z tilini asragan xalq o‘z tarixi va kelajagini ham asraydi.
Shu fikrlar bilan Turk tili bayrami turk tilimizning yanada boyishiga va dunyoda yanada kuchli mavqega ega bo‘lishiga xizmat qilishini tilayman. Turk tilining rivoji va uni asrab - avaylash yo‘lida mehnat qilgan barcha til va madaniyat namoyandalarini rahmat va minnatdorlik bilan yod etaman. «26 - sentabr Turk tili bayramimiz muborak bo‘lsin!»
