Bugun davlat OAVlarida e’lon qilingan xabarga ko‘ra Xitoy Davlat rahbari Si Szinpin xalqaro hamjamiyatni tezlik bilan G‘azoda butunlay otashkesim yo‘lga qo‘yilishi uchun choralar ko‘rishga chaqirar ekan, ayni vaqtda, falastinliklarning qonuniy huquqlarini qo‘llab - quvvatlash sa’y - harakatlarini kuchaytirishga undadi.
Xinhua axborot agentligining bildirishicha kecha (25.11.2025) Falastin xalqi bilan birdamlik xalqaro kunini yodga olish munosabati bilan BMT yig‘ilishiga yo‘llagan tabrik maktubida Si Szinpin, Falastin masalasi Yaqin Sharqdagi mojarolarning markazida turgani va xalqaro adolat va mintaqaviy barqarorlikka ta’sir ko‘rsatishini ta’kidladi.
Si Szinpin o‘z so‘zida: “Xitoy, Birlashgan Millatlar Tashkiloti Xavfsizlik kengashining doimiy a’zosi sifatida falastinliklarning qonuniy milliy huquqlarini tiklash borasidagi kurashini qat’iy ravishda qo‘llab - quvvatlaydi”, — degan ifodalarga o‘rin berdi.
Xitoy Davlat rahbari keskinlikning yanada kuchayib ketishining oldini olish va zo‘ravonlik qayta avj olmasligi uchun G‘azo inqirozi borasida xalqaro hamjamiyatyanada “faol choralar” ko‘rishi zarurligini ta’kidladi.
“Falastinni falastinliklar boshqarishi kerak”
Si Szinpin, mojarodan keyingi boshqaruv va G‘azoning qayta tiklanishi “Falastinni falastinliklar boshqarishi” tamoyili asosida olib borilishi, Falastin xalqining irodasiga to‘liq hurmat ko‘rsatilishi hamda mintaqa davlatlarining qonuniy xavotirlari inobatga olinishi lozimligini o‘z so‘ziga ilova etdi.
U uzoq muddatli yechimlarning zarurligini ta’kidlab, ikki davlatli yechimga erishish — har tomonlama va barqaror tinchlikka erishishning asosiy yo‘li ekanini takrorladi.
G‘azodagi insonparvarlik vaziyatini tezkor ravishda yaxshilash, falastinliklarning azob - uqubatlarini yengillashtirish zarurligiga ham aloh,da e’tibor qaratgan Si Szinpin, Falastin masalasi global boshqaruv tizimining samaradorligini ham sinovdan o‘tkazayotganini qayd etdi. Shunga qo‘shimcha ravishda davlatlarni Falastin masalasining asosiy ildizlari bilan yuzlashishga, mas’uliyatni zimmasiga olishga, qat’iy choralar ko‘rishga, tarixiy adolatsizliklarni bartaraf etishga va haqqoniyat hamda adolatni himoya qilishga chaqirdi.
