Mahalliy ommaviy axborot vositalari xabarlariga ko‘ra, Idaho shtatida o‘tkazilgan havo shousida AQShning ikki jangovar samolyoti havoda to‘qnashdi.
Ikki E/A-18G Viking Growler namoyish jamoasi samolyoti ishtirokidagi hodisa Mountain Home Harbiy-havo kuchlari bazasidagi Gunfighters Havo Shousi davomida yuz berdi.
Hodisadan qisqa vaqt o‘tib, tadbir boshlovchisi tomoshabinlarga AQSh Harbiy-dengiz kuchlariga mansub to‘rt nafar uchuvchining ham “xavfsiz ekani”ni ma’lum qildi. Tomoshabinlar tomonidan tasvirga olingan videoda ikki reaktiv samolyotning to‘qnashgani va hodisadan keyin osmonda to‘rtta parashyut suzib tushayotgani ko‘rinadi.
Havo shousi boshlovchisi: “Bizda to‘rtta sog‘lom parashyut bor edi. Ekipaj katapultadan foydalanishga muvaffaq bo‘ldi. Ular tutun ko‘tarilgan hududdan bir mil janubda joylashgan. Parashyutlar yerga tushdi”, dedi.
Rasmiylar hodisani “havodagi to‘qnashuv” sifatida tasnifladi. Tergov davom etayotgan bir paytda, Harbiy-havo kuchlari bazasi yopilgani bildirildi.
Mazkur shou Mountain Home Harbiy-havo kuchlari bazasida sakkiz yildan so‘ng ilk bor tashkil etilgan edi.
Idaho Statesman gazetasi ma’lumotiga ko‘ra, ushbu tadbirda avval ham baxtsiz hodisalar yuz bergan.
2018-yildagi havo shousida paraplan uchuvchisi halok bo‘lgan edi.
2003-yilda esa Harbiy-havo kuchlariga tegishli Thunderbird reaktiv samolyoti qulab tushgan, biroq uchuvchi katapultadan foydalanib omon qolgan edi.
Yakshanba kungi hodisa va undan keyin boshlangan tergov sababli havo shousining qolgan barcha tadbirlari bekor qilindi.
