Turkiya Respublikasi Prezidentining o‘rinbosari Jevdet Yilmaz  mamlakat global noaniqliklar fonida ishonch bilan harakat qilib, investitsiya muhitini mustahkamlash maqsadida yangi huquqiy, ma’muriy va moliyaviy choralarni joriy etganini bildirdi.

Yilmaz dushanba kuni poytaxt Anqarada o‘tkazilgan “Turkiya asri: Investitsiya uchun kuchli markaz” nomli tadbirda so‘zga chiqib, rasmiylar mamlakatning raqobatbardoshligini va investitsiya muhitini kuchaytirish uchun Prezident Rejep Tayyip Erdo’g’antomonidan juma kuni e’lon qilingan choralarni jamoatchilikka tushuntirish uchun bir araya kelganini aytdi.

Yilmaz global iqtisodiyotda noaniqlik kuchayib borayotganini va geosiyosiy keskinliklar ko‘plab hududlarda ortib borayotganini qayd etdi.

Prezident o‘rinbosari Eron va Isroil o‘rtasidagi keskinlikning kuchayish ehtimoli hamda AQShning jarayonga qo‘shilishi allaqachon zaif bo‘lgan muhitga qo‘shimcha bosim yuklayotganini ta’kidladi. U bu omillar energiya bozorlariga, savdo yo‘llariga va global moliyaviy sharoitlarga bevosita ta’sir ko‘rsatayotganini bildirdi.

Yilmaz bunday parchalanib borayotgan global sharoitda barqarorlik, prognoz qilinuvchanlik va ishlab chiqarish salohiyati investitsiya yo‘nalishlarini belgilovchi asosiy omillarga aylanganini ta’kidladi.

U Turkiya ushbu murakkab muhitni ishonch va intizom bilan boshqarayotganini, hukumat mintaqaviy rivojlanishlarning iqtisodiyotga ehtimoliy ta’sirini kamaytirish va bozorlarning barqaror ishlashini ta’minlash uchun zarur choralarni ko‘rayotganini aytdi.

Mamlakat makroiqtisodiy barqarorlikni saqlab qolayotganini, ishlab chiqarish bazasini mustahkamlab, bardoshli o‘sish yo‘lini davom ettirayotganini ham qo‘shimcha qildi.

“Bugun Turkiya investitsiya va sanoat faoliyati uchun barqaror, prognoz qilinadigan va ishonchli hamkor sifatida ajralib turibdi,” dedi Yilmaz.

Prezident o‘rinbosari mamlakatning kuchli sanoat infratuzilmasi, rivojlangan logistika imkoniyatlari va global qiymat zanjirlariga chuqur integratsiyasi investorlar uchun raqobatbardosh va mustahkam ekotizim yaratib berayotganini ta’kidladi.

Yilmaz shuningdek, “Yevropa, Osiyo va Yaqin Sharq chorrahasida joylashgan strategik geografik o‘rnimiz global ta’minot zanjirlari qayta shakllanayotgan davrda katta ustunlik beradi,” deya qo‘shimcha qildi.

U mamlakat tobora ishlab chiqarish, savdo va taqsimot uchun markaziy baza bo‘lib borayotganini qayd etdi.

Yilmaz yakunida, “Mamlakatimizning raqobatbardoshligini oshirish va investitsiya muhitini yanada mustahkamlash maqsadida yangi huquqiy, ma’muriy, moliyaviy va institutsional islohotlarni amalga oshirmoqdamiz,” dedi.