Livan Sog‘liqni saqlash vazirligi bayonotiga ko‘ra, dushanba kuni ertalab Isroilning Bayrut janubi va Livan janubini nishonga olgan hujumlarida kamida 31 kishi qurbon bo‘ldi, 149 kishi jarohatlandi. Vazirlik bu raqamlar qidiruv-qutqaruv ishlari davomida o‘zgarishi mumkinligini qayd etdi.
Isroil ommaviy axborot vositalarining xabar berishicha, Isroil armiyasi Livanda bir qator havo zarbalarini amalga oshirgan va buni "Shimoliy Isroilga otilgan raketalarga javob" deb atagan. Hizbulloh yakshanba kuni bergan bayonotida, AQSH va Isroil hujumlaridan so‘ng Eronni qo‘llab-quvvatlash "burch" ekanini bildirdi.
Isroilning ushbu so‘nggi hujumlari AQSH va Isroilning shanba kuni Eronga zarba berishidan so‘ng mintaqaga yoyilgan to‘qnashuvlarni yanada kengaytirdi. Hizbulloh Tehronning Yaqin Sharqdagi asosiy ittifoqchilaridan biri hisoblanadi.
To‘qnashuvlar boshlangandan buyon jami 260 dan ortiq kishi hayotdan ko‘z yumdi. Ularning aksariyati (200 dan ortiq) Eronda qayd etilgan. Mintaqaviy miqyosda yoyilgan javob zarbalari va to‘qnashuvlar natijasida Isroilda kamida 10, Livanda 31, AQSHda 3 va Fors ko‘rfazi davlatlarida bir necha kishi halok bo‘lgani xabar qilingan.
2023-yil oktyabr oyida Hamasning Isroilga hujumi va undan keyin Isroilning G‘azoda amalga oshirgan genotsid harakatlari oqibatida Hizbulloh bilan yuz bergan to‘qnashuvlar tashkilotni ma’lum darajada zaiflashtirgan edi. Isroil va Hizbulloh 2024-yil noyabr oyida o‘t ochishni to‘xtatish bo‘yicha kelishuv imzolagan bo‘lsa-da, Isroil Livandagi nishonlarga zarba berishda davom etmoqda.
Eslatib o‘tamiz, Hizbulloh o‘tgan yilning iyun oyida Isroil va Eron o‘rtasida yuz bergan 12 kunlik urush davomida hech qanday harbiy aralashuv amalga oshirmagan edi.
