Yevropa Ittifoqi tashqi ishlar vazirlari bugun bosib olingan G‘arbiy Sohildagi noqonuniy aholi punktlari bilan savdo aloqalarini cheklash bo‘yicha yangi choralarni muhokama qiladi. Diplomatlarning ma’lum qilishicha, yig‘ilishda ushbu tashabbusga yetarli darajada siyosiy qo‘llab-quvvatlov mavjudmi yoki yo‘qligi o‘rganiladi.

Muhokama Yevropa Komissiyasining maxfiy hujjatiga tayanadi. Unda savdo cheklovlari uchun uchta variant — import litsenziyalash tizimi, taqiqlovchi bojlar yoki to‘liq savdo taqiqi taklif etilgan.

Yevropa Ittifoqi uzoq vaqtdan buyon Yaqin Sharq siyosati bo‘yicha yagona to‘xtamga kelishda qiynalib keladi, chunki 27 a’zo davlat o‘rtasida bu borada chuqur ixtiloflar mavjud. Biroq, so‘nggi paytlarda noqonuniy ko‘chmanchilar zo‘ravonligining ortishi va Isroil hukumatining posyollarni kengaytirish siyosatiga qarshi davlatlar tomonidan bosim kuchaydi.

Eslatib o‘tamiz, Xalqaro Sud iyul oyida bergan maslahat xulosasida Isroilning G‘arbiy Sohildagi mavjudligini noqonuniy deb topgan va xalqaro hamjamiyatni ushbu vaziyatni qo‘llab-quvvatlovchi savdo yoki investitsiya aloqalarini cheklashga chaqirgan edi. Isroil Tashqi ishlar vaziri Gideon Saar esa ayrim Yevropa hukumatlarining bu xulosani amalga oshirishga bo‘lgan urinishlarini «uyatli» deb atadi. Isroil o‘z navbatida G‘arbiy Sohilni «bahsli hudud» deb atab, bu yerda yahudiy mavjudligi ming yillik tarixga ega ekanini ta’kidlaydi.

Diplomatlarning anonim tarzda bildirishicha, bugungi yig‘ilishda biror-bir aniq qaror qabul qilinishi kutilmayapti; vazirlar faqat taklif etilgan variantlar yuzasidan o‘zaro fikr almashadi. Shuningdek, bunday qaror qabul qilish uchun barcha a’zo davlatlarning bir ovozdan roziligi kerakmi yoki «malakali ko‘pchilik» ovozi yetarlimi, degan masala ham ochiq qolmoqda. Yevropa Komissiyasi matbuot kotibi Paula Pinho hujjatning a’zo davlatlarga yuborilganini tasdiqladi, ammo uning tafsilotlari bo‘yicha izoh berishdan bosh tortdi.