Lavrov poytaxt Moskvada Moskva davlat xalqaro munosabatlar instituti — MGIMO o‘qituvchilari va talabalari bilan uchrashdi.
Uchrashuvda so‘zga chiqqan Lavrov Germaniyaning Rossiyaning Bonndagi bosh konsulligini yopish haqidagi qaroriga to‘xtalib, “Bu nemislar tomonidan qabul qilingan jirkanch qaror. Bonndagi bosh konsulligimizni asossiz bahona bilan yopishdi”, deya ta’kidladi.
Ukraina inqirozi haqida ham gapirgan Lavrov, “Ukrainadagi to‘qnashuvlar Yevropada natsizmga o‘rin qolmaydigan tarzda yakunlanishi kerak. Agar Ukrainadagi amaldagi rejimning hokimiyatda qolishiga yo‘l qo‘ysak, 1945-yilda natsizm ustidan g‘alaba qozonganlarga xiyonat qilgan bo‘lamiz”, dedi.
Lavrov G‘arb davlatlari bilan munosabatlarni davom ettirishga tayyor ekanliklarini, biroq bu munosabatlar avvalgidek bo‘lmasligini ta’kidladi.
“Ilgari ham, hozir ham bizni aldagan G‘arbga endi hech qachon ishonch bo‘lmaydi”, dedi u.
Erondagi vaziyat
AQSH va Isroil Yaqin Sharqdagi xavfsizlik masalalari bo‘yicha maslahatlashuvlarga jalb qilinishi kerakligini bildirgan Lavrov, “Eronning ham Fors ko‘rfazi mintaqasidagi xavfsizlik tizimiga qo‘shilishi mintaqada barqarorlikni ta’minlash yo‘lidagi muhim qadam bo‘ladi”, dedi.
Vazir Lavrov Erondagi vaziyat sababli “Shimol–Janub” transport yo‘lagi loyihasining amalga oshirilishi sekinlashganini qayd etdi.
“Biroq loyiha rejalarimizda qolmoqda va albatta amalga oshiriladi”, dedi Lavrov.
