Turkiya urushdan jabr ko‘rgan G‘azo uchun yordam ko‘rsatishda davom etadi va Falastin xalqiga umid manbai bo‘ladi, dedi Turkiya tashqi ishlar vaziri Hakan Fidan.
“Turkiya G‘azo uchun nafas, Falastin uchun esa umid bo‘lishda davom etadi. Biz, shuningdek, G‘azoni qayta tiklash yo‘lidagi sa’y-harakatlarni faol qo‘llab-quvvatlaymiz,” dedi Fidan juma kuni Germaniya tashqi ishlar vaziri Johann Wadephul bilan o‘tkazilgan qo‘shma matbuot anjumanida.
“G‘azoda tiklanayotgan har bir bino insoniyat vijdonining timsoli bo‘ladi. Bizning asosiy maqsadimiz — ikki davlatli yechimni amalga oshirish hamda barcha azoblarga qaramay tinchlik va farovonlik hukm suradigan Yaqin Sharqni barpo etishdir,” deya qo‘shimcha qildi Fidan.

Uning so‘zlariga ko‘ra, Anqara sulh o‘rnatilgach darhol yordam sa’y-harakatlarini kuchaytirdi va G‘azodagi gumanitar yordam uzoq muddatli hamda tizimli bo‘lishi kerakligini ta’kidladi.
Wadephul bilan uchrashuvda Fidan, Anqara va Berlin G‘azodagi sulh davom etishi, gumanitar yordam uzluksiz yetkazilishi va urushning butunlay yakunlanishi zarurligini qayd etganini bildirdi.

Vazifa guruhi va tinchlik kengashi

Turkiya tashqi ishlar vaziri mintaqada barqaror tinchlikka erishish uchun ikki davlatli yechimni amalga oshirish muhim qadam ekanini yana bir bor ta’kidladi.
U Yevropa davlatlari, xususan Germaniya, Falastin masalasi va G‘azo bo‘yicha konstruktiv qadamlar tashlashining ahamiyatini urg‘uladi.
“Turkiya erishilgan kelishuvni amalga oshirishda o‘z majburiyatlarini bajardi va kelgusida ham ko‘proq ish qilishga tayyor,” dedi u.

Fidan, shuningdek, bu doirada Turkiya prezidenti “vazifa guruhi, tinchlik kengashi yoki xalqaro barqarorlik kuchi” kabi tashabbuslarda ishtirok etishga qat’iy qaror qilganini qo‘shimcha qildi.