Isroil, 2024-yil noyabridan beri amalda bo‘lgan kelishuvni yana bir bor buzib, Livan janubiga qaratilgan havo hujumida bir kishini o‘ldirdi va ikki kishini yaraladi. Livan Sog‘liqni saqlash vazirligi hujum dushanba kuni Tir shahrida sodir bo‘lganini ma’lum qildi. Vazirlik qoshidagi Jamoat salomatligi favqulodda operatsiya markazi o‘z bayonotida hujum oqibatida bir kishi halok bo‘lgani va ikki kishi jarohatlanganini qayd etdi.
Livan davlatiga qarashli Milliy axborot agentligi (NNA), Isroilga tegishli uchuvchisiz uchish apparati (Dron) Tir shahri chekkasida bir avtomobilga hujum qilganini bildirdi. Agentlik, shuningdek, Isroil dronlari Livan janubidagi Zahrani va Bisariyeh hududlari uzra uchganini, yana bir dron esa Adissa–Markaba yo‘lidagi marmar zavodiga shovqinli bomba tashlaganini ifoda etdi.
Keyinchalik Livanlik guruh – Hizbulloh, Tir shahridagi hujumda o‘z avtomobili nishonga olinganini ta’kidlab, Al-Manar TV muxbiri Ali Nour al-Din halok bo‘lganini e’lon qildi. Hizbulloh o‘z bayonotida: “Ushbu jinoyat, dushmanning media sohasining barcha shakl va turlarini qamrab oladigan tarzda o‘z hujumlarini davom ettirayotganining xavfli ekanidan dalolat beradi. Isroil dushmanining jurnalist Nour al-Dinga qarshi sodir etgan ushbu xoinona suiqasd jinoyatini keskin qoralaymiz”, degan so‘zlarni keltirdi.
Alohida bir xabarda NNA, Isroilga tegishli tank Livan janubidagi Bint Jbeil mintaqasida joylashgan Aitaroun shaharchasi chekkasidagi uyni nishonga olganini bildirdi. Agentlik, shuningdek, Aitaroun yaqinidagi Hreika hududi, Jabal al-Batda yangi tashkil etilgan Isroil harbiy bazasidan otilgan bir necha minomyot snaryadlari bilan urilganini yetkazdi.
Isroil, o‘t ochishni to‘xtatish qoidalarini buzish davomida yuzlab livanliklarni o‘ldirgan bo‘lsa-da, so‘nggi urushda egallab olgan beshta Livan tepaligi bilan birga, o‘n yillar davomida nazoratida ushlab turgan boshqa hududlarni ham bosib olishda davom etmoqda.
Livan rasmiylariga ko‘ra, Isroil 2023-yil oktyabr oyida Livanga qarshi harbiy hujumlarni boshlagan va 2024-yil sentyabr oyida bularni keng ko‘lamli urushga aylantirgan; ushbu to‘qnashuvlarda 4000 dan ortiq kishi halok bo‘ldi va qariyb 17000 kishi jarohatlandi.
