Xalqaro Valyuta Jamg‘armasi (IMF) Bosh direktori Kristalina Georgieva payshanba kuni noaniqlikning qimmatga tushishini ta’kidlab, savdo siyosatidagi ziddiyatlarni tezda hal qilish va murosaga kelishga chaqirdi.
IMFning 2025 yilgi global siyosat kun tartibi bo‘yicha matbuot anjumanida so‘zlagan Georgieva, “asosiy savdo siyosatidagi o‘zgarishlar noaniqlikni keskin oshirib yubordi, bunga moliyaviy sharoitlarning qattiqlashuvi va bozorning yuqori o‘zgaruvchanligi ham qo‘shildi,” dedi.
U dunyo iqtisodiyoti yangi va katta sinovga duch kelayotganini, bu esa mamlakatlarni murakkab vaziyatga solib qo‘yganini ta’kidladi.
“Mamlakatlar savdo ziddiyatlarini imkon qadar tezroq hal qilish uchun konstruktiv ishlashi, ochiqlikni saqlab qolishi va noaniqlikni bartaraf etishi kerak. Asosiy ishtirokchilar o‘rtasida savdo siyosati bo‘yicha kelishuv zarur.”
O‘sishga yo‘naltirilgan islohotlar
Georgieva noaniqlik sharoitida kompaniyalar investitsiya qilmayotgani, uy xo‘jaliklari esa sarflash o‘rniga tejashni afzal ko‘rayotganini, bu esa allaqachon zaiflashgan o‘sish istiqbollarini yanada susaytirayotganini aytdi.
U, shuningdek, mamlakatlar asosiy iqtisodiyotlar o‘rtasidagi ko‘plab ziddiyatlarni keltirib chiqarayotgan nomutanosibliklarni hal qilishi kerakligini ta’kidladi. “Ba’zi mamlakatlar, masalan, Xitoy, xususiy iste’molni oshirish va xizmatlar sohasiga o‘tishni qo‘llab-quvvatlash uchun harakat qilishi kerak. Boshqalar, masalan, AQSh, o‘zining fiskal taqchilligini kamaytirishi lozim,” dedi u.
Georgieva barcha mamlakatlar tarif va notarif savdo to‘siqlarini kamaytirishi kerakligini ta’kidladi.
U, shuningdek, mamlakatlar iqtisodiy va moliyaviy barqarorlikni saqlash uchun choralar ko‘rishi kerakligini, mahsuldorlikni oshirish uchun o‘sishga yo‘naltirilgan islohotlarning muhimligini qayd etdi.
AQSh Moliya vaziri Skott Bessentning IMF va Jahon bankini o‘z asosiy vazifalariga qaytishga chaqirganiga e’tibor qaratgan Georgieva, AQShning fikrini yuqori baholashlarini, oldinda yo‘l borligini va ushbu masalaga e’tibor qaratayotganliklarini aytdi.
