Prezident Rejep Tayyip Erdo‘g‘an 30 - avgust G‘alaba bayrami munosabati bilan yurtdoshlariga murojaat qildi. Bu haqida Turkiya Respublikasi Prezidenti Administratsiyasi huzuridagi Axborot va kommunikatsiyalar boshqarmasi ma’lumot bo‘lishdi.
Erdo‘g‘an tarix sahifalarida «Bosh qo‘mondonlik maydoni jangi» nomi bilan qayd etilgan va Milliy kurashning eng muhim bosqichini tashkil etgan Buyuk G‘alabaning 104 - yilligi katta sharaf va faxr bilan nishonlanayotganini ta’kidladi. Prezident turk xalqi, Kipr turk xalqi hamda dunyoning turli mamlakatlarida yashayotgan yurtdoshlarni G‘alaba bayrami bilan tabrikladi.
Xorijdagi diplomatik vakolatxonalarda bayram quvonchiga sherik bo‘lgan mehmonlarga ham minnatdorchilik bildirgan Erdo‘g‘an, 30 - avgust G‘alabasi, Turkiya zaminining azaliy va abadiy vatan ekanini yana bir bor tasdiqlaganini qayd etdi. Uning so‘zlariga ko‘ra, Buyuk G‘alaba turk xalqining qullikni hech qachon qabul qilmasligini butun dunyoga namoyon etgan va hududga qaratilgan imperialistik qamalning buzilishiga zamin yaratgan.
Erdo‘g‘an bundan 104 yil avval xalq tomonidan namoyon etilgan qat’iyat, jasorat va matonat bugun ham Turkiya uchun kuchli motivatsiya manbai ekanini ta’kidladi. U Turkiyaning energetika, mudofaa sanoati, fan va texnologiya hamda tashqi siyosat kabi sohalarda erishayotgan yutuqlari bilan o‘z maqsadlari sari dadil qadam tashlayotganini bildirdi.
Prezident dunyoda, ayniqsa, mintaqada urushlar, to‘qnashuvlar, inqirozlar va siyosiy noaniqliklar kuchayib borayotgan bir paytda Turkiya prinsipial, qat’iyatli va insoniy qadriyatlarni markazga qo‘ygan faol siyosati bilan ajralib turayotganini qayd etdi.
Erdo‘g‘an so‘zining yakunida zulm kimdan kelishidan qat’i nazar, unga qarshi turadigan; mazlum kim bo‘lishidan qat’i nazar, unga yordam beradigan Turkiya mavjudligini ta’kidladi. Prezident, shuningdek, «Ustimizdagi moviy osmon qulamaguncha, ostimizdagi qora zamin yorilmaguncha» hech kim Turkiya va turk xalqini o‘zining «muborak kurashi»dan voz kechishga majbur qila olmasligini bildirdi.
