17-sentabr kuni Parij chekkasidagi litseylardan birida xodimlar yetishmasligi sababli boshlangan ish tashlash, litsey o‘quvchilarining o‘qituvchilari bilan birga namoyishlarga qo‘shilishi ortidan Fransiya bo‘ylab zo‘ravonliklarga aylanib ketdi.

Uchinchi haftasiga kirgan mamlakat miqyosidagi namoyishlar minglab kishining qo‘lga olinishiga va aksariyati o‘quvchilar bo‘lgan 1 000 dan ortiq odamning jarohatlanishiga sabab bo‘ldi.

Inson huquqlari tashkilotlari, kasaba uyushmalari va o‘quvchilar rasmiylarni haddan tashqari kuch ishlatishda aybladi.

5-oktabr kuni politsiyachining namoyishchi ustiga shovqin va yorug‘lik bilan karaxt qiluvchi granata uloqtirishi oqibatida bir yosh qo‘lidan ayrilganidan so‘ng, Fransiya politsiyasi ushbu vositalardan foydalanishni vaqtincha to‘xtatdi. Zo‘ravonliklar kuchayishi ortidan prezident Emmanuel Makron ham shoshilinch yig‘ilish chaqirdi.

Yuzaga kelgan tartibsizliklar Fransiya ta’lim tizimidagi o‘qituvchilar yetishmasligi, sinflarning haddan tashqari gavjumligi, infratuzilmaning tobora yomonlashuvi va hududiy tengsizliklar kabi chuqur ildiz otgan muammolardan kuchli norozilikni namoyon etmoqda. Taklif etilayotgan budjet qisqartirishlari esa bu muammolarni yanada og‘irlashtirmoqda.

Namoyishda qatnashgan bir o‘quvchi: “Ta’lim boshqaruvi shahar chekkalariga yetarli sarmoya kiritmayapti. Bu — sinfiy kamsitish va irqchilik”, dedi.

Ta’lim vazirligi ma’lumotlariga ko‘ra, 2024–2025-o‘quv yilida davlat litseylaridagi dars soatlarining qariyb 10 foizi o‘qituvchisiz o‘tgan.