Venesuela Prezidenti Nikolas Maduro AQSh bilan keskinlikning tez sur’atda kuchayishi ortidan chorshanba kuni Kolumbiyadagi siyosiy yetakchilar, ijtimoiy guruhlar va qurolli kuchlarga murojaat qilib, harbiy birdamlikni yo‘lga qo‘yishni taklif qildi.
Qo‘llab-quvvatlovchilariga murojaat qilgan Maduro, mintaqaviy “birlik” tinchlik va suverenitetning eng kuchli kafolati ekanini ta’kidladi hamda Kolumbiya armiyasini tashqi aralashuvning oldini olish uchun Venesuela bilan ittifoq tuzishga chaqirdi.
Maduro, “Ulardan Venesuela bilan mukammal birlikni yo‘lga qo‘yishlarini istayman, toki hech kim mamlakatlarimiz suverenitetiga tajovuz qilishga jur’at etolmasin”, — dedi.
“Tramp qo‘g‘irchoq hukumat istayapti”
Maduroning bu chaqirig‘i Vashingtondan kelgan, mojaroga ishora qiluvchi bir nechta bayonotlardan so‘ng yangradi.
Nikolas Maduro AQSh Prezidenti Donald Trampni, Venesuela “AQShning nefti, hududlari va boshqa boyliklarini o‘g‘irlagani” haqidagi ayblovlar ortidan, “mustamlakachilik niyatlari”da aybladi.
Maduro bu da’volar mamlakatida rejimni o‘zgartirish uchun bahona sifatida ishlatilayotganini aytib, yangi hukumat tuzish urinishlari tez orada muvaffaqiyatsizlikka uchrashidan ogohlantirdi.
Venesuela Prezidenti, “Ularning maqsadi — bir kun ham bardosh bera olmaydigan, ammo Konstitutsiyamiz va boyliklarimizni ularga topshiradigan qo‘g‘irchoq hukumat tuzishdir”, — deya Venesuela bunday urinishlarga qarshi turishini bildirdi.
Keskinlik seshanba kuni Trampning Maduro hukumatini “Xorijiy terror tashkiloti” deb e’lon qilish bilan tahdid qilishi ortidan yanada kuchaydi.
Tramp Truth Social platformasida Venesuela yaqinida AQSh dengiz kuchlari ishtirokining ortib borayotganini ham ta’kidlab, Karakas AQSh talablarini bajarmaguncha bosim kuchaytirilishini va’da qildi.
So‘nggi oylarda Karakas va Vashington o‘rtasidagi munosabatlar sanksiyalar, dengiz transport vositalarining musodara qilinishi va tobora keskinlashib borayotgan bayonotlar tufayli izchil ravishda yomonlashib bormoqda.
Maduroning Kolumbiyaga qilgan chaqirig‘i esa diplomatik va harbiy keskinliklar davom etar ekan, mintaqaviy ittifoqchilarni birlashtirishga qaratilgan sa’y-harakat sifatida baholanmoqda.
di.
