Shveysariyaning Burgenstok shahrida bo‘lib o‘tgan, yuqori darajali ilk uchrashuv hisoblangan Lyutsern ko‘li sammiti doirasidagi Eron bilan AQSh o‘rtasidagi muzokaralar dushanba kuni erta tongda yakunlandi. Muzokaralar Islomobod anglashuv memorandumi doirasida yakuniy kelishuvga erishish bo‘yicha muzokaralarni ilgari surishga qaratilgan bir qator mexanizmlar yuzasidan kelishuv bilan yakunlandi.
AQSh va Eron delegatsiyalari bosh muzokarachilar - AQSg vitse - prezidenti JD Vens hamda Eron parlamenti raisi Muhammad Boqir G‘olibof boshchiligida kutilgan ilk to‘g‘ridan - to‘g‘ri uchrashuvning 100 daqiqalik birinchi bosqichini o‘tkazdi.
O‘rtamchilar tomonidan e’lon qilingan qo‘shma bayonotga ko‘ra muzokaralarning asosiy natijalari quyidagilardan iborat:
1. Yuqori darajadagi qo‘mita
Tomonlar o‘rtamchilik jarayonini siyosiy jihatdan nazorat qiladigan yuqori darajadagi qo‘mitani tashkil etish bo‘yicha kelishib oldilar.
2. Ishchi guruhlar
AQSh va Eronning bosh muzokarachilari Eronning yadro dasturi, sanksiyalar bilan bog‘liq masalalar hamda memorandumning samarali ijrosini ta’minlash uchun mo‘ljallangan nizolarni hal etish mexanizmlariga qaratilgan ishchi guruhlarga rahbarlik qiladi. Yuqori darajadagi qo‘mita bosh muzokarachilardan muntazam hisobotlar olib boradi va ushbu ekspert guruhlar faoliyatini nazorat qiladi.
3. 60 kunlik yo‘l xaritasi
Tomonlar anglashuv memorandumi asosida 60 kun ichida yakuniy kelishuvga erishishni nazarda tutuvchi yo‘l xaritasi bo‘yicha kelishuvga erishdilar. Bu esa texnik muzokaralarni zudlik bilan boshlash uchun asos yaratadi.
4. Texnik muzokaralar
Burgenstok shahrida hafta davomida barcha hal etilmagan masalalar yuzasidan texnik muzokaralar davom ettiriladi.
5. Hormuz bo‘g‘ozi
«Hodisalar va noto‘g‘ri tushunishlarning oldini olish» hamda savdo kemalarining Ho‘rmuz bo‘g‘ozi orqali xavfsiz o‘tishini ta’minlash maqsadida aloqa kanali tashkil etildi. Burgenstokdagi qizg‘in to‘rt tomonlama muzokaralardan so‘ng Eron Tashqi Ishlar vazirligi Matbuot xizmati kotibi Ismoil Baqaei tomonlar strategik ahamiyatga ega ushbu dengiz yo‘lida xavfsizlikni ta’minlash mexanizmini yaratish bo‘yicha kelishuvga erishganini ma’lum qildi.
6. Livan bo‘yicha deeskalatsiya markazi
Tomonlar Livanni ham o‘z ichiga oladigan va o‘rtamchilar ko‘magida faoliyat yuritadigan «deeskalatsiya markazi»ni tashkil etishga rozilik bildirdi. Mazkur tuzilma memorandum doirasida Livandagi harbiy amaliyotlarning to‘xtatilishiga rioya etilishini kuzatib boradi.
7. O‘rtamchilarning majburiyati
Qatar va Pokiston «konstruktiv muhit»ni saqlab qolish hamda yakuniy kelishuv sari erishilayotgan taraqqiyotni qo‘llab - quvvatlash maqsadida o‘z sa’y - harakatlarini davom ettirishlarini bildirdilar.
