Anadolu agentligi (AA) xabariga ko‘ra, Isroilning G‘azoda turar joy binosi va fuqarolik avtomobilini nishonga olgan havo hujumlari oqibatida yetti falastinlik halok bo‘ldi, 45 nafardan ortiq kishi yaralandi.
Sog‘liqni saqlash manbalari juma kuni Anadolu agentligiga bergan ma’lumotida, yaradorlar orasida uch nafar ayol ham borligini, ular G‘azodagi Ash-Shifo shifoxonasi hamda Falastin Qizil Yarim Oy jamiyatining dala gospitaliga olib ketilganini bildirdi.
Manbalarga ko‘ra, qurbonlarning uch nafari fuqarolik avtomobiliga uyushtirilgan hujumda, yana to‘rt nafari esa turar joy binosiga qilingan zarba oqibatida halok bo‘lgan. Yaradorlardan ayrimlarining ahvoli og‘ir ekani qayd etildi.
Voqea joyida faoliyat yuritayotgan Anadolu agentligi muxbiri hujumdan bir necha soat o‘tganiga qaramay, G‘azoning g‘arbidagi Rimal mahallasida zarba berilgan binoda yong‘inlar hanuz davom etayotganini ma’lum qildi.
Bino katta zarar ko‘rgan bo‘lsa, atrofdagi inshootlar ham jiddiy talafot oldi.
Guvohlar Anadolu agentligiga Isroilning uchuvchisiz uchish apparati Abu Asi yoqilg‘i quyish shoxobchasi yaqinidagi Al-Vahda ko‘chasida harakatlanayotgan fuqarolik avtomobiliga ham hujum qilganini aytdi.
Sulh buzilishlari davom etmoqda
Isroil 2023-yil oktabr oyidan buyon G‘azoda olib borayotgan genotsid urushi davomida, asosan ayollar va bolalardan iborat 72 ming 600 nafardan ortiq falastinlikni o‘ldirdi, 172 mingdan ortiq kishini yaraladi.
Hujumlar natijasida hududning katta qismi vayronaga aylantirildi va butun aholi o‘z yashash joylarini tark etishga majbur bo‘ldi.
2025-yil oktabr oyida sulhga erishilganiga qaramay, Isroil uni har kuni buzishda davom etmoqda. So‘nggi ma’lumotlarga ko‘ra, sulh buzilishlari oqibatida yana qariyb 857 falastinlik halok bo‘lgan, 2 ming 486 kishi esa yaralangan.
