Turkiya Prezidenti Rajab Toyyib Erdo’gan payshanba kuni Ummon poytaxti Maskatda Sulton Haytam bin Toriq bilan uchrashdi. Uchrashuvda sanoat, mudofaa va aloqa sohalarida ikki tomonlama hamkorlikni yanada mustahkamlash masalalari muhokama qilindi.

Liderlar mintaqaviy va global masalalarni muhokama qilib, Falastin bo‘yicha birdamlik va o‘zaro hamfikrlikni tasdiqlashdi. Bu uchrashuv Erdo’gan’ning Fors ko‘rfazidagi uch davlatni o‘z ichiga olgan safari doirasidagi so‘nggi manzili bo‘ldi. U bundan avval Quvayt va Qatarga tashrif buyurgan edi.

Payshanba kungi uchrashuv Maskatdagi Al Alam saroyida yopiq eshiklar ortida o‘tkazilganini Turkiya diplomatik manbalari tasdiqladi.

Turkiya Aloqa boshqarmasi bayonotida ta’kidlanishicha, ikki yetakchi uchrashuv davomida ikki tomonlama munosabatlar, mintaqaviy va global masalalarni batafsil muhokama qilgan.

“Turkiya va Ummon o‘rtasida chuqur tarixiy va birodarlik rishtalari mavjud. Prezident Erdo’g’an bu tashrif ikki davlat o‘rtasidagi birdamlikni yanada mustahkamlashiga ishonch bildirdi,” deyiladi bayonotda.

Shuningdek, bayonotda quyidagilar qayd etilgan:

“Prezident Erdo’g’an sanoat, iqtisodiyot, mudofaa va aloqa sohalarini o‘z ichiga olgan keng yo‘nalishlarda Ummon bilan hamkorlikni kuchaytirish rejalashtirilayotganini ta’kidladi.”

“Turkiya va Ummon ko‘plab masalalarda, xususan Falastin masalasida, o‘xshash pozitsiyaga ega. Prezident Erdo’g’an Ummonning mintaqadagi vositachilik va muloqotga asoslangan sa’y-harakatlarini yuqori baholadi hamda G‘azoda ikki davlatli yechimga erishish yo‘lida birgalikda harakat qilish rejalari borligini qo‘shimcha qildi,” deyiladi bayonotda.

Uchrashuv yakunida ikki davlat o‘rtasida jami 16 ta yangi hujjat imzolanganini Aloqa boshqarmasi ma’lum qildi.