AQSh Davlat departamenti Ukraina uchun GPS bilan boshqariladigan bomba to‘plamlarini o‘z ichiga olgan 373,6 million dollarlik qurol sotuvini tasdiqlaganini ma’lum qildi.
Departament mavzu haqida seshanba kuni (05.05.2026) bergan bayonotida, Xorijiy harbiy savdolar dasturi doirasida Kiyevga Qo‘shma To‘g‘ridan - to‘g‘ri zarba o‘q - dorilari va Kengaytirilgan masofa (JDAM-ER) to‘plamlari bilan tegishli jihozlar sotilishiga ruxsat berilganini bildirdi.
Paket 1 200 dona KMU - 572 JDAM dum qismi to‘plami va 332 dona KMU - 556 JDAM dum qismi to‘plamiga ilova sifatida portlatgich tizimlari, ehtiyot qismlar, logistika yordami va texnik hujjatlarni o‘z ichiga oladi.
Bayonotda: “Taklif etilayotgan sotuv Yevropada siyosiy barqarorlik va iqtisodiy taraqqiyotning harakatlantiruvchi kuchi bo‘lgan hamda AQShning hamkori hisoblangan mamlakat xavfsizligini oshirish orqali AQShning tashqi siyosati va milliy xavfsizlik maqsadlarini qo‘llab - quvvatlaydi” - degan ifodalarga o‘rin berildi.
Unda shuningdek: “Taklif etilayotgan sotuv Ukraina uchun yanada mustahkam havo mudofaasi qobiliyatini ta’minlab, uning mavjud va kelajakdagi tahdidlarga qarshi o‘zini himoya qilish hamda mintaqaviy xavfsizlik vazifalarini bajarish imkoniyatini oshiradi. Ukraina ushbu mahsulot va xizmatlarni o‘z qurolli kuchlariga integratsiya qilishda hech qanday qiyinchilikka duch kelmaydi” - deb qo‘shimcha qilindi.
Harbiy muvozanatga ta’sir qilmaydi
AQSh Davlat departamenti bayonotida taklif etilayotgan sotuv “mintaqadagi asosiy harbiy muvozanatni o‘zgartirmasligi” ta’kidlandi.
Shuningdek, bayonotda: “Ushbu sotuv AQShning mudofaa tayyorgarligiga salbiy ta’sir ko‘rsatmaydi” - deyiladi.
Ukraina bilan Rossiya o‘rtasidagi urush 2022 - yilning fevral oyida boshlanganidan beri AQSh Kiyevga harbiy va gumanitar yordam sifatida taxminan 187 milliard dollar yuborgan.
