Turkiya milliy futbol terma jamoasi 2026 yilgi FIFA Jahon chempionati D guruhi so‘nggi uchrashuvida Los-Anjeles stadionida AQShni 3:2 hisobida mag‘lub etib, turnir bilan g‘alaba bilan xayrlashdi.
Uchrashuvni tezkor boshlagan AQSh 3-daqiqada Auston Trustyning Uğurjan Chaqir darvozasiga yo‘llagan goli evaziga 1:0 hisobida oldinga chiqdi.
Turkiya ko‘p o‘tmay hisobni tenglashtirdi. Barish Alper Yilmaz AQSh himoyasidan yorib o‘tib, to‘pni Real Madrid futbolchisi Arda Gyulerga uzatdi. Arda 10-daqiqada kuchli zarba bilan to‘pni darvozaga joylab, o‘zi va Turkiyaning ushbu Jahon chempionatidagi ilk goliga mualliflik qildi.
Ardaning goli Turkiyaning turnirdagi 63-zarbasi bo‘ldi. Shuningdek, bu Turkiyaning FIFA Jahon chempionatlaridagi 2002 yilda Ilhan Mansiz urgan goldan buyon kiritilgan ilk goli bo‘ldi. Shu tariqa milliy jamoa 24 yillik golsiz seriyasiga yakun yasadi.
Birinchi bo‘lim o‘zaro hujumlar ostida davom etdi. 31-daqiqada ajoyib paslar almashinuvidan so‘ng jarima maydonchasida to‘pni qabul qilgan Orkun Ko‘kchü aniq zarba bilan Turkiyani yana hisobda oldinga olib chiqdi.
Yaqin masofadan gol
Ikkinchi bo‘limni faol boshlagan AQSh 49-daqiqada hisobni yana tenglashtirdi. Turkiya himoyachilari jarima maydonchasiga uzatilgan to‘pni to‘liq uzoqlashtira olmaganidan so‘ng, Sebastian Berhalter to‘pni egallab, yaqin ustun tomonga kuchli zarba berdi va hisobni 2:2 ko‘rinishiga keltirdi. Bu uning milliy terma jamoa safidagi ilk goli bo‘ldi.
Turkiya esa 90+8-daqiqada Kaan Ayhanning yaqin masofadan yo‘llagan zarbasi bilan g‘alaba golini urdi va uchrashuvni 3:2 hisobida yakunladi. Shu tariqa milliy jamoa turnirdagi ilk va yagona g‘alabasini qo‘lga kiritdi.
Uchrashuvdan so‘ng Turkiya milliy terma jamoasi bosh murabbiyi Vinchenso Montella futbolchilari bilan faxrlanishini va mamlakatga boshi baland holda qaytishlarini aytdi.
Montella jamoa turnirdan avvalroq chiqib ketgani, shuningdek, AQSh muxlislari qarshisida maydonga tushganiga qaramay, futbolchilar o‘z iste’dodi, salohiyati va xarakterini namoyish etganini ta’kidladi.
