Kambodjaning davlat axborot agentligi Agence Kampuchea Presse xabariga ko‘ra, Kambodja Mudofaa vazirligi payshanba kuni ertalab Banteay Meanchey viloyatidagi bir qishloq Tayland armiyasi tomonidan artilleriya o‘qi ostiga olinganini, hujum oqibatida bir nafar tinch aholi vakili halok bo‘lganini ma’lum qildi. Kambodja Milliy Assambleyasi bu holatni “shafqatsiz va g‘ayriinsoniy bosqin” deb atab, keskin bayonot bilan qoraladi.

Tayland ommaviy axborot vositalari esa Tayland armiyasining Kambodja BM-21 raketalari orqali Sa Kaeo viloyatidagi bir qishloqqa zarba berganini va buning natijasida fuqarolik infratuzilmasiga jiddiy zarar yetganini bildirganini yozdi. Tayland rasmiylariga ko‘ra, to‘qnashuvlar davomida 23 nafar taylandlik harbiy va bir nafar tinch aholi vakili halok bo‘lgan, yana 41 nafar fuqaro bilvosita ta’sirlar oqibatida hayotdan ko‘z yumgan.

Kambodja Ichki ishlar vazirligi 31 nafar kambodjalik tinch aholi vakili halok bo‘lganini e’lon qildi. Vazirlik, shuningdek, mamlakat bo‘ylab davom etayotgan to‘qnashuvlar sabab qariyb 610 ming kishi ko‘chishga majbur bo‘lganini bildirdi. Tayland tomonida esa 150 mingdan ortiq kishi o‘z uyini tark etgan, harbiylar avvalroq bu raqamni 400 ming deb baholagan edi.

Thai Enquirer nashrining xabariga ko‘ra, Taylandning Chanthaburi viloyatida boshlangan harbiy muzokaralar hafta davomida davom etadi. Shanba kuni ikki davlat mudofaa vazirlarining hamraisligida Umumiy Chegara qo‘mitasining keng qamrovli yig‘ilishi o‘tkazilishi rejalashtirilgan. Bangkok ma’muriyati texnik asoslar bo‘yicha kelishuvga erishilmasa, uchrashuvni davom ettirmasligi va hech qanday bitim imzolamasligini ma’lum qildi.