Turkiya Respublikasi Madaniyat va turizm vazirligi dushanba kuni vazir Mehmet Nuri Erso’y AQShning Anqaradagi elchisi Tom Barrakni qabul qilganini ma’lum qildi. Uchrashuvda madaniyat va turizm sohalaridagi hamkorlik masalalari ko‘rib chiqildi.

Muloqot chog‘ida Turkiya va AQSh o‘rtasidagi sayyohlik oqimini oshirishga qaratilgan sa’y-harakatlar, madaniy merosni muhofaza qilish hamda madaniy boyliklarning noqonuniy savdosiga qarshi kurash masalalari muhokama qilindi.

Erso’y tomonlar uzoq yillardan buyon davom etayotgan Turkiya–AQSh munosabatlari doirasidagi hamkorlikni ko‘rib chiqqanini ta’kidladi.

“Uchrashuvimizda Turkiya va Amerika Qo‘shma Shtatlari o‘rtasidagi azaliy munosabatlar doirasida madaniyat va turizm sohalaridagi hamkorligimizni atroflicha muhokama qildik”, dedi Erso’y.

Vazirning bildirishicha, o‘zaro sayyohlik oqimini rivojlantirish, madaniy merosni muhofaza qilish va madaniy boyliklar kontrabandasiga qarshi kurash bo‘yicha olib borilayotgan qo‘shma ishlar yuzasidan fikr almashildi. Shuningdek, mamlakatlar o‘rtasidagi muloqot va madaniy aloqalarni yanada mustahkamlaydigan hamkorlik yo‘nalishlariga e’tibor qaratildi.

Raqobat kuchli dunyoda Turkiyaning mavqeini himoya qilish

Elchi Barrak Turkiyaning tarixi, madaniy xilma-xilligi, mehmondo‘stligi va geografik afzalliklarini yuqori baholab, bu omillar mamlakatning global turizm sohasidagi mavqeini mustahkamlashini aytdi.

Barrak, shuningdek, Erso’yning Turkiya turizm salohiyatini rivojlantirish yo‘lidagi sa’y-harakatlarini yuqori baholadi. Davom etayotgan hamkorlikning muhimligini ta’kidlagan elchi: “Vazir Erso’yning raqobat kuchli bo‘lgan ushbu xalqaro sharoitda Turkiyaning mavqeini himoya qilish va yanada yuksaltirish borasidagi dadil rahbarligi, haqiqatan ham, tahsinga sazovor”, dedi.