Tramp shanba kuni tongda ijtimoiy tarmoqdagi sahifasida bergan bayonotida, AQSH armiyasi Eronning Xarg oroliga yirik hujum uyushtirganini aytdi va Hormuz bo‘g‘ozidan kema o‘tishiga to‘sqinlik qilinsa, Eronning neft infratuzilmasi ham nishonga olinishi haqida ogohlantirdi.
AQSH Markaziy qo‘mondonligi (CENTCOM) Yaqin Sharq tarixdagi eng kuchli bombardimon amaliyotlaridan birini amalga oshirganini va Eronning "ko‘z qorachig‘i" hisoblangan Xarg orolidagi barcha harbiy nishonlar butunlay yo‘q qilinganini bildirdi.
Tramp hozircha oroldagi neft infratuzilmasini nishonga olmaslikni afzal ko‘rganini, biroq Eron yoki boshqa biror tomon Hormuz bo‘g‘ozidan kemalarning erkin va xavfsiz o‘tishiga aralashsa, bu qarorini qayta ko‘rib chiqishini aytdi.
Strategik orol
AQSH va Isroil shu vaqtgacha Xarg oroli masalasida ehtiyotkorlik bilan harakat qilib kelayotgan edi. Biroq Tramp ma’muriyatidagi ayrim rasmiylar Yaqin Sharqdagi AQSH-Isroil urushi davom etar ekan, orolni egallab olish ham variantlar orasida borligini bildirishgan.
Eron qirg‘oqlaridan qariyb 30 kilometr uzoqlikda joylashgan ushbu orol, "JP Morgan"ning so‘nggi ma’lumotlariga ko‘ra, Eron xom neft eksportining taxminan 90 foizini tashkil qiladi. Manhattan hududining uchdan bir qismiga teng bo‘lgan ushbu orolda amalga oshiriladigan har qanday harbiy harakat juda tez va keng ko‘lamli natijalarga olib kelishi mumkinligi aytilmoqda.
Eronning hujumlari dunyo xom nefti va suyultirilgan tabiiy gazining (STG) qariyb beshdan biri o‘tadigan Hormuz bo‘g‘ozidagi dengiz qatnovini deyarli to‘xtatish darajasiga keltirdi. Hujumlar, shuningdek, boshqa Fors ko‘rfazi davlatlaridagi neft infratuzilmasiga ham ta’sir ko‘rsatdi.
Tramp ortib borayotgan yoqilg‘i narxlari bilan kurashayotgan bir paytda, neft eksportini qayta jonlantirish uchun AQSH harbiy-dengiz floti tez orada tankerlarni bo‘g‘ozdan o‘tayotganida himoya qilishni boshlashini aytdi.
Xarg oroli 1960 va 1970-yillarda Eron neft ishlab chiqarishni kengaytirgan davrda strategik ahamiyat kasb etgan. Mamlakat qirg‘oqlarining katta qismi supertankerlar uchun juda sayoz bo‘lgani sababli, orol neft eksportining asosiy markaziga aylangan.
