Kolombiya prezidenti Gustavo Petro yakshanba kuni AQSh prezidenti Donald Trampning unga nisbatan bildirgan giyohvand moddalar savdosi haqidagi ayblovlari va tahdidlarini rad etdi.
Amerika kuchlari shanba kuni erta tongda Karakasga hujum uyushtirdi. Vashingtonning neftga boy ushbu Janubiy Amerika mamlakati ustidan nazoratni ta’minlash va Venesuela yetakchisi Nikolas Maduroni hokimiyatdan chetlatish maqsadida amalga oshirilgan keskin reyd chog‘ida mamlakatdagi harbiy nishonlar bombardimon qilindi.
Yakshanba kuni prezident samolyotida jurnalistlarga gapirgan Tramp Kolombiyaga nisbatan ham shunga o‘xshash harbiy amaliyotlar o‘tkazilishi mumkinligini aytib, ushbu Janubiy Amerika mamlakatini “juda kasal” deb atadi va uni “kokain ishlab chiqarib, AQShga sotishni yoqtiradigan kasal odam boshqarayotgani”ni iddao qildi.
Tramp Gustavo Petroni nazarda tutib: “U yerda kokain zavodlari va ishlab chiqarish markazlari bor, ammo buni juda uzoq davom ettira olmaydi”, dedi.
Kolombiyaga Venesuelaga o‘xshash harbiy aralashuv rejalashtirilayotgani so‘ralganda, respublikachi yetakchi: “Bu menga yaxshi g‘oya bo‘lib tuyuladi”, deb javob berdi.
Tramp ayblovlarini tasdiqlovchi dalil keltirmadi, biroq: “Sababini bilasiz, chunki ular juda ko‘p odamlarni o‘ldirmoqda”, degan da’voni ilgari surdi.
Petro esa bu ayblovlarni rad etib, “uning ismi sud hujjatlarida uchramasligini” ta’kidladi.
Petro X ijtimoiy tarmog‘ida: “Meni badnom qilishni bas qiling, janob Tramp”, deb yozdi.
Kolombiya prezidenti yana shunday dedi: “Qurolli kurashdan o‘tgan, keyin esa Kolombiya xalqining tinchlik yo‘lidagi kurashi bilan tanilgan Lotin Amerikasi prezidentini bunday tahdid qilib bo‘lmaydi.”
Petro Tramp ma’muriyatining mintaqadagi harbiy harakatlarini keskin tanqid qildi va Vashingtonni “huquqiy asos bo‘lmasdan” Maduroni olib ketishda aybladi.
Petro yakshanba kuni X’te e’lon qilgan yana bir postida: “Do‘stlar bomba tashlamaydi”, deb yozdi.
Kolombiya Tashqi ishlar vazirligi AQSh prezidentining tahdidlarini “qabul qilib bo‘lmaydigan aralashuv” deb atab, mamlakatlariga “hurmat” ko‘rsatilishini talab qildi.
Kolombiya va AQSh mintaqada harbiy va iqtisodiy jihatdan muhim ittifoqchilar bo‘lishiga qaramay, ikki davlat o‘rtasidagi munosabatlar tarangligicha qolmoqda.
Ikki yetakchi Trampning ikkinchi prezidentlik muddati boshlanganidan beri boj tariflari va migratsiya siyosati kabi masalalarda muntazam ravishda qarama-qarshi pozitsiyada turib kelmoqda.